Реонски Центар Аеродром

Реонски центар се дави во прашина

Покрај новата населба во Нови Лисиче, се' уште боде очи прашливиот и запуштен земјен простор

Бојан Шашевски

И по четири-пет години откако започна да се населува и урбанизира реонскиот центар во Ново Лисиче, на влезот во комплексот од згради и деловни простори покрај булеварот „АСНОМ“, близу новата пошта боде очи прашлив и необјасниво запуштен земјен простор. Кога ќе заврне, целата нерамнина плива во кал, а кога е суво, пак, ветерот создава магла од прашина. Насекаде има раскопани површини и едно чудо пластови земја. На нечистиот простор пред минитрговскиот центар каде што функционираат маркетите „Тедико“, „Кам“ и игротеката „Би хепи“ може да се забележи и една огромна дупка, за која локалните дуќанџии и жители велат дека само оние што ја знаат може да го спасат автомобилот од влечна служба.

Граѓани од населбата посочуваат дека запуштениот простор пред трговскиот се користи и како паркинг, како илегален пазар за камионџии, но и како стојалиште за диви таксисти. За решавање на проблемот, жителите се обратиле до Општина Аеродром, постојано разговараат и со дуќанџиите, но се чини дека сите само си ја префрлуваат топката, а локацијата повторно останува нечепната.

„Неасфалтираниот и запуштен простор создава грда слика за една населба со урбан предзнак. Не ми е јасно како локалните власти тапкаат в место со години и не се најде некој да го среди местото да заличи на нешто. Да не зборуваме за безбедноста на граѓаните во вечерните часови. Нерамниот простор и длабоката дупка веќе искршија неколку автомобили. Во неа може да влезе цела предница заедно со тркалата на возилото. Дупката е обрасната со трева, во внатрешноста има ѓубре, а околу неа никаква сигнализација или предупредување“, се пожали Антонио Глигоровски, жител од Ново Лисиче.

Тој објаснува дека граѓаните интервирале и до општинскиот граѓански центар, но целата работа само се одложува и никој не сака да се организира да го реши проблемот.

Од Општина Аеродром ни рекоа дека на таа локација, според Деталниот урбанистички план се предвидува изградба на сервисна улица. „Нејзината реализација ќе се спроведе откако ќе влезе во програмата за работа на Општината. Градежните парцели пред објектите треба да ги уредат самите сопственици или корисници, додека Општината, во конкретниот случај е надлежна за делот каде што ќе се гради улицата“, информираа од Секторот за односи со јавност на Општина Аеродром, наведувајќи дека ќе се чека на измените во ДУП-от, по што треба да се почне со изградба на предвидената улица.

Дотогаш, се чини, дуќанџиите од трговскиот центар ќе треба сами да го израмнуваат и да го чистат просторот, но и да си набават песок да ја закопаат дупката.

Новите 3 згради на АДСДП во Реонски Центар Аеродром...

На овие 3 слики се гледа во позадината/далечината и... мислам дека станува збор за новото основно училиште во Реонски Центар...