Булевар Србија

Булеварот „Србија“ во Усје доби атмосферска канализација

Канализацијата, која се градеше околу една година, е со должина од 550 метри и зафатнина од 800 милиметри

Градот Скопје ја заврши изградбата на атмосферската канализација на дел од булеварот „Србија“, на потегот од Цементарница „Усје“ до Кисела Вода. Се работи за инвестиција вредна осум милиони денари, која вчера ја пуштија во употреба градоначалниците на Скопје и на Кисела Вода, Коце Трајановски и Марјан Ѓорчев.

На жителите од населбата Усје, по подолго време, атмосферската канализација ќе им овозможи нормално движење по улицата, бидејќи ќе се избегне поплавувањето на сообраќајницата по секој дожд. Канализацијата, која се градеше околу една година, е со должина од 550 метри и зафатнина од 800 милиметри.

„Околу седум илјади жители ќе можат во секој момент да ја користат оваа улица не плашејќи се дека таа ќе се поплавува како што беше случајот досега. Сега следува проширување на улицата и спојување со остатокот од булеварот ’Србија’“, истакна градоначалникот Трајановски.

За таа намена, како што потенцираше градоначалникот Ѓорчев, Општина Кисела Вода работи на решавањето на имотно-правните проблеми со сопствениците на имотите, кои се наоѓаат на трасата на новата улица.

Во меѓувреме, како што информираа од Градот Скопје, продолжува и проширувањето на булеварот „Србија“, од Аеродром до Кисела Вода. Моментно во тек се земјените работи на потегот од раскрсницата со „Видое Смилевски-Бато“ до „Трета македонска бригада“, кои деновиве треба да продолжат и во правецот на раскрсницата со „Првомајска“. (С.Н.)

http://www.utrinski.com.mk/default.asp?ItemID=22870C66ED37EC43A1AD25CFE7B96DA8