Патот Драч - Тирана - Дебар пред крај на изградбата

Новиот автопат, кој е дел од Коридорот 8, ќе биде готов за само два месеца, што ја покажува посветеноста на албанските власти кон инфраструктурните проекти

09:00 | 19.04.2010 | Автор: Шпиц

Патот Драч - Тирана - Дебар, кој е дел од Коридорот 8 и кој треба да ги поврзе Драч на Јадранско Море и Варна, Бугарија на Црно Море, ќе биде завршен за два месеца. Ова го изјави главниот инженер на патот, Фарук Хаба, за албанските медиуми. Покрај тоа, патот ќе помогне за побрз транспорт на стока и луѓе по воден пат до пазарите на Италија, односно до пристаништата Бари и Бриндизи.
Албанските градежници имаа неколку предизвици при изградбата на овој пат, познат и под името Арбри, кој ќе го намали патувањето од Тирана до Скопје за 100 километри и ќе излезе кај Дебар, наместо постоечката делница која поминува на граничниот премин Ќафасан на крајниот

југозапад на Македонија. Најголем проблем во изградбата претставуваше тунелот долг 3 и пол километри, кој беше намален за стотина метри што овозможи да биде завршен побрзо.
Инаку, овојпат, покрај тоа што има голема регионална важност, поврзувајќи ги Албанија, Македонија и Бугарија, има и национална важност внатре во Албанија зашто ја подобрува транспортната комуникација меѓу главниот град Тирана и пристанишниот албански град, Драч, како и севкупниот транспорт во северниот дел на Албанија. Токму затоа, албанската влада патот го гради во најбрз можен рок, работејќи истовремено на две делници. Проектот за патот беше завршен кон средината на минатата година, за годинава тој да биде готов.
Колку се сериозни албанските власти во однос на изградбата на патиштата во земјата покажува и фактот што државата предвиде 339 милиони евра за инфраструктурни инвестиции, што претставува дури 60 отсто од средствата наменети за јавни инвестиции оваа година. Над 200 милиони евра од овие пари се од сопствени средства.
Друг голем транспортен проект во земјата е и патот кон Косово, на кој што долгиот петкилометарски тунел беше пробиен минатата година. Албанија, исто така, сака да изгради приморска магистрала преку која ќе може да се патува од Црна Гора до Грција. Со оглед на ваквиот инвестициски бум во транспортната инфраструктура, за овие проекти во Албанија се заинтересирани и странските компании и тоа не само за изградба

на патиштата, туку и за управување со нив и нивно одржување. Австриската градежна компанија Страбаг, која има годишни приходи во износ од 11 милијарди евра и проекти низ цела Европа, одлучи да учествува на тендерите за изградба на патот Тирана - Елбасан, како и на тендерите за енергетските проекти, како што се хидроцентралата Скавица и изградбата на пристаништето во Валона.


Се проширува и пристаништето во Драч

Кога станува збор за поморскиот сообраќај, Албанија сака Драч да го направи регионален пристаништен центар и да преземе барем мал дел од поморскиот сообраќај од грчките пристаништа, пред се, од Солун. Покрај постоечкото, во Драч се гради уште едно индустриско пристаниште, со што ќе се зголеми капацитетот за пренос на стоки. Овој пристаништен проект е одлично стратегиско дополнување на патот Арбри и може да се очекува да ја намали македонската зависност од солунското пристаниште, иако тоа и во иднина ќе остане главна поморска пристанишна точка за македонскиот и за регионалниот транспорт на стоки.