Ски центар Кожуф

В сабота промотивно скијање на Кожуф

До најновиот скијачки центар може да се стигне само од гевгелиска страна

Промотивното скијање на Кожуф првиот ден ќе биде бесплатно за сите посетители, а инаку ќе може да се скија од четврток до крајот на викендот

КОЖУФ - Од 26 декември започнува скијачката сезона на ски-центарот Кожуф со промотивно скијање, кога сите вљубеници во зимскиот спорт ќе можат бесплатно да скијаат. Во функција ќе бидат шестседечка жичница, два ски-лифта и два ресторана – бачила, кои се наоѓаат на двете крајни точки од жичницата. Комплетно е завршена електрификацијата на центарот, а до скијачкиот центар се' уште се стигнува единствено преку гевгелиската страна. Од месноста Смрдлива Вода започнува асфалтиран пат во должина од 13 километри. Од ски-центарот ги предупредуваат возачите да бидат повнимателни. Во почетокот на патот ќе има сообраќајна патрола која ќе ги известува возачите за состојбата на патот и евентуалната потреба од поставување зимска опрема на возилата. Деновиве снежната покривка на скијачките терени достигнува и до еден метар.

Од ски-центарот упатуваат отворена покана до сите заинтересирани љубители на снежните спортови и до вљубениците во зимските пејзажи да присуствуваат на официјалното почнување на скијачката сезона. „Промотивното скијање првиот ден ќе биде бесплатно за сите посетители, а инаку ќе може да се скија од четврток до недела. Годинава ’Ски Кожуф‘ ќе функционира како дневен центар“, велат од компанијата ’Ски Кожуф‘.

Граѓаните од Тиквешијата не го кријат задоволството од почнувањето со работа на новиот скијачки центар. Според нив, најголема мана е тоа што центарот, иако се наоѓа во близина на Кавадарци, нема пристапен пат од кавадаречка страна.

Во програмата за доградба на „Ски Кожуф“ за наредната година е влезена изградба на уште три жичници, хотел со капацитет од 150 легла и чаршија, која ќе опфаќа околу 3000 м2 деловен простор, а наредната сезона ќе се изграделе околу 60 викенд-куќи. Менаџерите велат дека центарот ќе има околу илјада легла и од ноември идната година ќе може да работи како вистински планински туристички центар. „Моментно скијачкиот центар вработува 50 луѓе, а наредната година тој број ќе се зголеми на 250“, вели извршниот директор Ангел Наков.

„Ски Кожуф“ се простира на илјада хектари. Препарираните патеки покриваат 65 километри. (А.Д.)