Чадот од гасната централа ги исплаши граѓаните

Жители на Аеродром реагираат дека од централата доаѓа неподнослив звук и дека излегува густ бел чад, за кој се плашат дека е штетен

Граѓаните што живеат на улицата Владимир Комаров се жалат дека во последните две недели, новата гасна централа, која се наоѓа веднаш до топланата „Исток“ на АД „Топлификација“, создава неверојатна бучава и испушта големи количества бел чад. Тие се уплашени од отровите од чадот и бараат од општината и Министерството за животна средина писмено да ги информира за состојбата на воздухот во нивната околина.

Спроти централата е и основното училиште „Браќа Миладиновци“ и детска градинка, па многумина и што не живеат во тој дел од градот се плашат за здравјето на своите деца, кои учат во овие образовни институции.

- Во последните две недели, секој ден преку реката Вардар од централата доаѓа неподнослив звук. Дома не можеме да седиме, непријатно е, како да работат милион машини во исто време. Од оџаците на новата гасна топлана излегува густ бел чад и се плашиме дека е штетен. Има ли закон што не' штити и дали се почитува Законот за бучавата - прашува Кире Синадиновски, жител од населбата Аеродром.

Од Министерството за животна средина велат дека знаат за проблемот со бучавата и дека неколкупати апелирале граѓаните што живеат во близина на централата.

- Гасната централа деновиве пробно е пуштена во работа токму со намера сите недостатоци, како што е и големата бучава, да се регулираат. Граѓаните од околината на организирани трибини биле информирани за работата на централата. Според стандардите, топланата, која работи на гас, не испушта отровни материи во воздухот, туку одвреме-навреме испушта бели „облаци“ од водена пареа, која исчезнува и нема ни вкус ни мирис. Ние секако ќе ги следиме сите чекори на фирмата што ќе работи со топланата. Граѓаните треба да имаат малку трпение додека трае оваа пробна работа. Сега се исправаат сите работи што понатаму не смеат да се појават и да бидат на штета на живиот свет - изјави Фирус Мемед, директор на Инспекторатот за животна средина при надлежното министерство.

Никој од фирмата „Те-То“, која стои зад гасната топлана, не даде образложение до кога неподносливиот звук ќе ги мачи граѓаните.

Станува збор за прва гасна централа во Македонија, во која ќе се произведуваат 1.500 гигават-часови електрична енергија годишно, што е 20 отсто од годишното производство во Македонија. Сместена е во населбата Керамидница, во општина Гази Баба.

Од Топлификација, која има дел од акциите во гасната централа, велат дека ниту една друга земја во регионот нема ваква станица. Од Топлификација објаснуваат дека станува збор за гасна централа од најмодерен тип, која освен што имала извонредни технички карактеристики, ги задоволува и најстрогите норми за заштита на животната околина на Европската Унија.