Спортски објекти (општо)

Асфалтирано новото мултинаменско игралиште покрај реката Брегалница- Делчево

Откако претходно се уреди земјиштето, се загради игралиштето со мрежа и се завршија сите подготвителни работи за асфалтирање, беше поставен асфалтен слој, со што ова спортско игралиште ја доби својата конечна габаритна целина. Остануваат за монтажа стативите и кошевите, како и доуредување на патеката околу игралиштето.

Како последна фаза за градежна за реализација на овој дел кај игралиштето, преостанува доизградба на улицата, решавањето на осветлувањето за целиот простор,  како и поставувањето на елементите од трибините и детското игралиште кое е дел од проектот за изградба на 10 детски игралишта на територијата на градот Делчево.

Асфалтирањето го направи екипа на ГП Гранит од Делчево, по претходно спроведена процедура за јавна набавка.

http://www.delcevo.gov.mk

НА ЕЗЕРОТО МЛАДОСТ

На продажба два плаца за тениски игралишта

На брегот на езерото Младост кај Велес ќе бидат изградени две современи тениски игралишта. Плацевите што ќе се продаваат преку јавно наддавање се во близина на хотелот Романтик", мотелот Езеро Младост" и објектот на Уни проком банка. Површината на плацевите изнесува 7.432 квадратни метри за едниот и 5.231 квадрати за другиот плац. Продажбата, според условите, ќе биде со почетна цена од 300 денари по квадрат и платен депозит од 222.960 денари за првиот и 156.930 денари за вториот плац.

Според условите, право на учество на јавното наддавање што ќе се одржи на 25 март годинава во просториите на Министерството за транспорт и врски имаат сите правни и физички лица од земјата и државјани на земји од ЕУ и ОЕЦД. По изборот на најдобрите понудувачи Министерството склучува договор и се обврзува во рок од девет месеци да му обезбеди одобрение за градба од општина Велес, а идниот сопственик објектот треба да го изгради во рок предвиден согласно одредбите на Законот за градба.

По изградбата на угостителските и комерцијални објекти, викендиците, објектите за домување, изградбата на колекторот за отпадните води и уредувањето на плажите, велешкото езеро се повеќе го привлекува вниманието на домашните и странски туристи. Со изградба на две тениски игралишта и продажбата на уште триесетината плацеви наменети за угостителство езерото Младост ќе стане идеално место за одмор и рекреација не само за велешани, туку и за жителите од Скопје, Свети Николе, Штип и други градови од Македонија.