СЕ КРОИ СОПСТВЕНОСТА НА НАЈГОЛЕМИОТ ЕВРОПСКИ ЕНЕРГЕТСКИ ПРОЕКТ

И Македонија гас во трка за Јужниот тек

Во конкуренција е и германската компанија "Vintershal", подружница на хемискиот концерн BASF, за која се шпекулира дека треба да добие до 20 отсто од проектот

Голем интерес на европските компании за влез во проектот Јужен тек" преку кој ќе се реализира главното снабдување на Европа со природен гас од Русија. Овие информации деновиве ги потврдуваат странските агенции и наведуваат дека рускиот премиер, Владимир Путин, и неговиот италијански колега Силвио Берлускони се договориле за влез на германската компанија "Vintershal", подружница на хемискиот концерн BASF, во гасоводот Јужен тек".

Се шпекулира дека компанијата "Vintershal" се очекува да добие од 10 до 20 отсто учество во проектот, иако овие информации се уште не се потврдени од компанијата. Германскиот "Vintershal" веќе е дел од други гасни проекти и компанијата учествува со 20 проценти во гасоводот Северен тек", преку кој рускиот гас испорачан од Балтичкото Море треба да стаса на европските пазари до 2012 година.

И Македонија влегува во оваа трка, рамо до рамо со големите енергетски корпорации. Македонската влада веќе го има формирано претпријатието Македонија гас" кое ќе работи заедно со Газпром" на реализацијата на гасоводната мрежа на наша територија. Реално потпишувањето на договор меѓу Газпром" и Македонија гас" се очекува до крајот на годинава.
Началникот на Секторот за управување со проекти на Газпром", Леонид Чугунов, при неодамнешната посета на земјава истакна дека е неопходен период од најмалку една година за техничките подготовки за гасоводот, по што ќе се знае дали и во каков вид тој ќе поминува низ земјава..

Во остра конкуренција италијанската компанија "Eni" успеа да стане дел од овој проект, а до крајот на годинава се очекува и влез на францускиот енергетски гигант ЕDF. Енергетските власти велат дека уделот на ЕDF ќе достигне околу 10 проценти.

"Јужниот тек" ќе има годишен капацитет од 63 милијарди кубни метри руски гас којшто без проблеми ќе стасува во сите земји - кориснички во Европа. За подобро функционирање на енергетскиот пазар во Европа, деновиве претседателот на Европскиот парламент, Јежи Бусек предложи создавање на шенген-зона и за енергетиката, бидејќи според него, европската енргетска заедница може да биде машинита која ќе ги раководи енергетските политики, а со тоа и полесно ќе се пребродат предизвиците од оваа област.http://www.vecer.com.mk/default.asp?ItemID=4ACC34C7896D2D4EB01085B14BDCC5B0

ЗЕМЈАВА СЕ ПОДГОТВУВА ДА СТАНЕ ДЕЛ ОД ЕВРОПСКАТА ГАСНА МРЕЖА

Гасификацијата - спас за Македонија!

За министерот за економија, Фатмир Бесими, енергетскиот сектор е значаен за економскиот раст на земјава и токму затоа гасификацијата е значајна алка

Македонија засилено се подготвува да се приклучи кон проектите за европската гасификација, со што ќе стане дел од стратешките гасоводи Јужен тек или Набуко. Минитерот за економија, Фатмир Бесими, неколкупати укажа дека Владата е сериозно заинтересирана за овие гасоводни проекти. За министерот Бесими енергетскиот сектор е значаен за економскиот раст на земјава и токму затоа гасификацијата е значајна алка.
- Треба да ги искористиме сите можности за да се поврземе со регионалните и меѓународните гасоводни мрежи со цел да го добие епитетот на транзитна зона и во делот на гасот и во делот на енергетиката - смета Бесими.
Во меѓувреме некои општини во државава сами го туркаат процесот на гасификација. По Куманово и Струмица ја интензивира гасификацијата, но и општините Ново Село, Босилово и Василево.

Од локалната власт најавуваат дека во Струмица до почетокот на идната грејна сезона ќе го реализира капиталниот проект од областа на енергетиката за пренос, управување и дистрибуција со природен гас за што е формирано и јавно претпријатие за енергетика Струмица гас". Гасоводната мрежа од 13 километри ќе се спои со мрежата на Петрич во Бугарија.
Енергетските експерти сметаат дека гасификацијата ќе биде спас за Македонија.
Професорот Костантин Димитров, кој е експерт за енергетика, вели дека идејните проекти за гасификација на земјава се готови, а до крајот на годинава ќе се изготват главните проекти, по што треба да почне и проширувањето на мрежата.
- Прстенот со едниот крак ќе се шири кон Гостивар и Тетово, а со другиот кон Гевгелија и Струмица - објаснува Димитров. Тој смета дека додека да се реализира Јужиот тек, следните неколку години можеме да го користиме постојниот гасовод кон Бугарија.

Здружението на градинари од струмичкиот крај Еко градинар", очекува покрај во домаќинствата, природниот гас во Струмичко да најде најголема примена во областа на земјоделството, пред се за загревање на оранжериите и пластениците, за производство на ран зеленчук, во прехранбената, санитарната и во индустријата за мебел и градежни материјали.
Додека во земјава се прават проекти, во соседна Бугарија гасификацијата е топ тема.
Бугарија договори кредит од 1,2 милијарди евра со Европската инвестициска банка (ЕИБ) кои што ќе бидат наменети за изградба на гасоводот Набуко. Како што ја информирал бугарската јавност бугарскиот премиер Бојко Борисов, акционерите на овој проект, енергетските компании РЊЕ, ОМВ, МОЛ, Булгаргаз", Трансгаз" и Ботас", планираат од сопствени средства да обезбедат 30 отсто од вредноста на Набуко".

Лани Русија и Бугарија потпишаа Договор за изградба на гасоводот Јужен тек. Енергетскиот експерт Валериј Несторов во изјава за Независимаја газета" оценува дека иако Бугарија обезбеди пари за Набуко, сепак тоа не ја промени реалноста за реализацијата на овој проект. Тој оценува дека во натпреварот меѓу овие два гасовода поголеми шанси има Јужен поток, бидејќи има доволно ресурси, како руски, така и од странство, но и Газпром" како моќна компанија.
Македонија гасификација ќе ја чини меѓу 200 и 300 милиони долари, што зависи од големината на трасата. Министерот за финансии, Зоран Ставрески, веќе информираше дека во финална фаза се подготовките околу трасата. За него особено е значајно парнерството со Газпром", бидејќи на Македонија и се отвора значајна енергетска преспектива. Ќе се формира и заедничка компанија преку која ќе се реализира изградбата на гасоводот.
Изградбата на кракот на Јужен тек е предвидено да заврши во 2015 година.

Валентина МАРЈАНОВИЌ