Велосипедски патеки и пунктови

Општина Карпош и Град Скопје почнаа проект за обележување на паркиралишта за велосипеди. Во него се вклучени и 27 студенти по архитектура од државниот и од приватните факултети, кои на тридневната работилница во Општината го дизајнираа изгледот на паркинг-просторот за велосипеди на пет локации, претходно договорени меѓу општинските и градските власти. На подрачјето на општина Карпош тоа се трговскиот центар „Карпош 3“, зелениот пазар во Тафталиџе и супермаркетот на „Тинекс“ во Карпош 3. Надлежните велат дека најкретивните идеи за паркиралиштата ќе бидат наградени и искористени за определените локации. Проектот под мотото „Со велосипед е во ред! А каде да се паркирам?“ се реализира заедно со Здружението „Коалиција за одржлив развој“ од Скопје, а поддржан е и од мрежната канцеларија на Регионалниот центар за животна средина за централна и источна Европа, финансирана од Шведската меѓународна агенција за развој. Целта на овој проект е приклучување кон заложбите за промовирање на велосипедот како алтернативно превозно средство во градот и обезбедување услови за зголемување на бројот на граѓаните што го употребуваат велосипедот не само рекреативно, туку и како транспортно средство за своите секојдневни потреби. - Конкретниот проблем кој се адресира преку оваа иницијатива е недостигот од безбедни или барем некакви паркиралишта за велосипеди низ градот. Опциите како што се врзување на велосипедот за дрво, клупи и за ограда ниту се секогаш можни, ниту се соодветни “ велат од Карпош. По презентацијата на студентските решенија, Општината ги избра најдобрите идеи според кои ќе се изработат и постават паркиралишта за велосипеди на избраните локации. - На овој начин јавно ќе покажеме дека велосипедите се еднакво средство за транспорт и им праќаме порака на „заколнатите“ автомобилџии да размислат и да почнат почесто да се одлучуваат за велосипед “ додаваат општинарите.

Р.П.

Ќе се одбележат пет паркинзи за велосипеди

Метални рампи, на кои граѓаните ќе можат да ги оставаат велосипедите, ќе бидат поставени на пешачките патеки пред зелените пазари "Буњаковец" и "Тафталиџе", пред трговските центри "Карпош 3" и "Буњаковец" и пред маркетот "Тинекс" во населбата Карпош 3.