Охрид ќе добие и базен за пливање

Охрид - Тоа што Охрид има прекрасно езеро не значи дека неговите жители и многубројните туристи можат во него да се капат секој ден. Во Охрид имаше два затворени базена (и еден отворен во „Силекс“), меѓутоа со приватизацијата, новите газди одлучија да ги претворат во конгресни сали, затоa што тие им носат повеќе профит.

Охрид имаше уште еден отворен базен, дури и со вистински олимписки димензии, како дел од Спортско рекреативниот центар „Билјанини Извори“, ама тој со години и децении служеше за собирање смет и понекое ситно животинче. Охриѓани го викаа „Кај жабарникот“. Наместо гордост, беше срам.

Новото раководство на Центарот даде иницијатива, а локалната самоуправа и пари и сега интензивно се работи на доопремувањето на базенот, дури и со најава дека тој ќе биде затворен и ќе се користи во текот на целата година. Од Центарот најавуваат дека за многу скоро време, уште во текот на главната туристичка сезона, оптимистички дури и за десетина дена, охриѓани и нивните многубројни гости ќе добијат нов современ простор за рекреација и забава. По сезоната, базенот ќе биде достапен за користење на школите за пливање, каде што ќе тренираат младите пливачи.

Директорката на Центарот - ЈП „Билјанини извори“ Гордана Јованоска вели: „Очекуваме уште за време на главната туристичка сезоната базенот да биде отворен, додека од септември натаму размислуваме за две решенија - да продолжи да работи како отворен или, пак, да го покриеме. Ќе видиме кое решение ќе се покаже како подобро“, најави Јованоска.

За оваа инвестиција, локалната самоуправа од Охрид издвои средства од околу 100 илјади евра. „Уште пред да се пушти базенот во употреба, веќе се купени лежалки и чадори и слична дополнителна опрема. Треба сега само да се монтира филтер-станицата и другата опрема што ја очекуваме да пристигне од Словенија“, додава Јованоска. (В.М.)

Претставници од повеќе надлежни институции изготвија анализа за реализацијата на владиниот проект за реконструкција и модернизација на затворениот пливачки базен во Струга која ќе чини меѓу 700 и 800 илјади евра.

- Се надевам дека проектот наскоро ќе се реализира, а затворениот пливачки базен повторно ќе биде ставен во функција, вели пратеничката од ВМРО-ДПМНЕ од Струга, Лиљана Затуроска.

Повеќе години  пливачите од Струга во текот на зимскиот период тренизните ги одржуваат на базените во Скопје. Во текот на летото го користат отворениот пливачки базен кој се наоѓа во центарот на градот, а кој исто така е руиниран.

СРЦ „БОРИС ТРАЈКОВСКИ“ НАЈАВУВА ИЗГРАДБА НА ТУРИСТИЧКА АТРАКЦИЈА

Аква-парк лете, лизгалиште зиме

Планирано е водениот парк со четири отворени базени да се гради на празната локација од 6.500 квадратни метри кај базенот „Младост“ и салата „Борис Трајковски“

Јавното претпријатие „Борис Трајковски“ ќе гради забавен воден парк, а инвестицијата ќе се реализира само ако Општината Карпош биде расположена да нацрта градежна маркичка за ваква содржина во урбанистичкиот план. Планирано е тој да се гради на празната локација од 6.500 квадратни метри кај базенот „Младост“ и салата „Борис Трајковски“ во населбата Карпош 4. Директорот на спортскиот центар Ратко Капушевски е уверен дека по изградбата, оваа државна инвестиција ќе претставува туристичка атракција.

Четири отворени базени

Според замислата, аква-паркот би располагал со четири отворени базени со различни димензии и со други содржини за забава на вода. Надлежните објаснија дека базените лете би служеле за капење, додека зиме еден или два од нив би биле претворени во лизгалишта.

- Планираме изградба на градски аква-парк доколку наидеме на волја и желба од страна на градоначалникот на Општина Карпош, Стевчо Јакомовски да го внесе во детаљниот урбанистички план. Изградбата на овој парк би траела не повеќе од две-три години - изјави директорот Ратко Капушевски.

Очекувањата се тој да биде готов до 2015 година, но засега тоа е само желба.

Според Генералниот урбанистички план, локацијата е наменета за паркинг. Во моментов од претпријатието ја комплетираат документацијата за овој проект, а потоа во Општината ќе побараат измена на урбанистичкиот план.

Имајќи го предвид досегашниот однос меѓу локалната и државната власт и анимозитетот по многу прашања, останува нејасно дали градоначалникот Јакимовски ќе има добра волја да соработува со власта по ова прашање. Од СРЦ „Борис Трајковски“ велат дека Јакимовски им ветил поддршка.



И Јакимовски би го градел

Од кабинетот на градоначалникот не одговорија дали ќе направат измена на урбанистичкиот план. Наместо тоа, само рекоа дека Јакимовски изразил желба наместо државното претпријатие, Општината Карпош да го добие земјиштето.

- Доколку Владата го даде земјиштето на Карпош, сами ќе градиме аква-парк - вели градоначалникот.

Во моментов раководството од „Борис Трајковски“ прибира документација за да поднесе барање до Министерството за транспорт и врски за одземање на корисничкото право на постојниот субјект и земање на земјиштето под свое, на долготраен закуп.

- Овој проект е на Владата на Македонија, но не е исклучена можноста и да оди во форма на јавно-приватно партнерство. При создавање на сите локациски услови за изградба, до добивање за одобрение на градба ќе се разгледаат сите можности за пронаоѓање потенцијален инвеститор, односно јавен партнер. Во моментов се работи на нумеричките податоци на парцелата. Потоа ќе формираме иницијатива за промена на детаљниот план, кој е во фаза на изготвување. Градоначалникот на Општина Карпош ни вети дека ќе го вметне во планот - изјави директорот Капушевски.

Како што е познато, аква-парк треба да се гради и на територијата на Аеродром, во близина на салата „Јане Сандански“, но како приватна инвестиција. Така барем е зацртано во планот, а дали и кога ќе се реализира, останува да покаже времето.

Куманово ќе добие затворен базен

Се работи за капитална инвестиција каква што не сме имале подолг период. Со изградбата на базенот ќе се заокружи и ќе се уреди целиот комплекс околу спортската сала. Базенот ќе биде граден по сите современи стандарди за такви објекти и со можност за одржување на големи спортски манифестации- вели градоначалникот Зоран Дамјановски.  

Инвестиција е врeдна 1,8 милони евра, а парите ќе ги обезбед локалната самоуправа. За изградба на објектот е подготвена сета потребана документација, а распишан е и тендерот за изведувач на работите. Планирано е камен темелникот ќе биде удрен на Денот на ослободување на градот 11 Ноември.

На Куманово му е многу неопходен затворен базен, бидејќи со години наназад децата организирано со автобус заминуваат на пливање во Скопје.

Се бара проект за аквапаркот во „Борис Трајковски“

Спортскиот центар „Борис Трајковски“ ја почна постапката за изградба на првиот аквапарк во Скопје
Од центарот распишаа тендер за изработка на основен и изведбен проект за изградба на рекреативниот аквапарк, за кој во пролетните месеци известувавме дека треба да биде направен до 2015 година. Првиот аквапарк ќе зафати 6.500 квадратни метри, и ќе никне на просторот меѓу картингот и пливачкиот базен „Младост“. Со неговата изградба ќе се комплетира замислениот изглед за овој спортски центар.

Ќе се менуваат плочките, па рекреативците и спортистите ќе мора да бараат друга пливачка алтернатива два месеца

Само неколку месеци откако подновениот базен во Карпош беше свечено отворен, тој повторно ќе се реновира. Овојпат е на ред менувањето на плочките во водното корито. Затворениот базен, кој е дел од СЦ „Борис Трајковски“ и долго време работеше во ужасни услови, на 6 јуни доби нов ентериер, систем за филтрација на водата, тераса со бар и терен за одбојка на песок, потоа реконструиран покрив, фасада, сончеви колектори и столчиња на трибината со капацитет за 500 гледачи. Со ваквите градежни зафати некогашниот базен „Младост“ стана пливачка арена и истовремено го присвои и името од СЦ „Борис Трајковски“.

Но, при комплетната реконструкција вредна 1,4 милион евра не беше опфатено вадењето на старите и лепење нови плочки. Сега базенот ќе биде повторно затворен, а многубројните рекреативци и спортисти ќе мора да бараат друга пливачка алтернатива од 15 декември до 5 февруари.

Од СЦ „Борис Трајковски“ велат дека се одлучиле за реновирање во овој период, бидејќи ќе работеле интензивно за време на новогодишните и божикните празници, додека кај граѓаните немало потреба од спорт, а во истиот период е и зимскиот распуст кај децата, па надлежните утврдиле дека дел од нив ќе биле на зимски одмор и ќе преовладувало празничното расположение со потреба од одмор и релаксирање.

„Генерално, тврдам дека овие месец и половина веднаш ќе поминат, а на долг рок квалитетот и визуелноста ќе бидат на задоволство на сите наши корисници. Станува збор за многу мал број граѓани што би го користеле објектот во овој период, наспроти задоволството на 150.000 граѓани во период од 10 јуни до 1 септември и на дечињата што секојдневно телесно се развиваат во школата“, објаснува Ратко Капушевски, директор на СЦ „Борис Трајковски“.

Тој посочува дека не постои никаков проблем со коритото, туку дека плочките на базенот ќе биле сменети од естетски и од визуелни причини, бидејки во реконструкцијата и во модернизацијата на објектот биле опфатени сите позиции освен плочките, и тоа поради времето што не било во нивен интерес, а објектот морал да биде во функција за летната сезона.

„Ова лето базенот го посетија преку 150.000 рекреативци надвор од школите и наставата што ја нуди базенот. Модернизацијата на плочките во коритото на базенот е финансирана од страна на Владата која и го продуцираше ова јавно добро за граѓаните. Базенот е само една од низата успешни капитални инвестиции, па, кога е опфатена секоја позиција, грев е во коритото да има плочки стари над 30 години. Истите беа опфатени во проектот за модернизација и на реконструкција, но добрата што произлегуваат од овој капитален објект имаа нужна потреба да бидат достапни за граѓаните на почетокот на летната сезона во јуни“, вели Капушевски.

Реконструкцијата на коритото на базенот ќе ја спроведува фирмата „Билд“, која била избрана на јавна набавка каде што единствен критериум за евалуација била цената. Новиот зафат ќе чини 50.000 евра.

„Проектот предвидува отстранување на старите плочки, поставување водоотпорна изолација и поставување нови плочки со најмодерен оквир околу двата базена (малиот и големиот). По реконструкцијата, нема да постои никаков проблем со ниту една позиција што беше опфатена при модернизацијата“, смета Капушевски.

Инаку, во зимскиот период рекреативците можат да го посетуваат базенот од понеделник до сабота од 10 до 16 часот, но и во ноќниот термин од 20,30 до 23,30 часот. Има школи за ватерполо, пливачка тренинзи за деца и за возрасни, аква-аеробик, а има и група за лица со посебни потреби.

http://www.utrinski.mk/?ItemID=0215DF2AE76F3347A7AD23473A4E02AC