Телеком арена (арена Филип II Македонски)

	Коментари (0)

Со реновирањето, "Градски" ќе собира 17.000 гледачи, наместо досегашните 14.000

Градскиот стадион во Скопје дефинитивно ќе се реновира, откако Владата наложи Фудбалската федерација да добие итен кредит со кој ќе го плати "шминкањето" на нашиот храм на фудбалот, јавува Макфакс.

Со ова паднаа во вода сите шпекулации дека Гордиот Албион нема да дојде во Скопје. Ова, откако претходно Јавното претпријатие за стопанисување со станбен и деловен простор (ЈПССДП), кој е сопственик на стадионот, одби да го почне реновирањето, со образложение дека немаат пари, иако имаа цврста банкарска гаранција дека во септември ќе ги добијат финансиите.

„Владата наложила да добиеме итен кредит и ние се обративме веднаш до Комерцијална банка, од каде што ни најавија дека денеска ќе ги имаме парите на сметка. Таму и го приложивме финансискиот план за средбата со Англија на 6 септември, од кој може да се види дека сигурно ќе ги вратиме парите во септември“ - изјави генералниот секретар на ФФМ Лазар Митровски.

Со реновирањето, "Градски" ќе добие зголемен капацитет откако ќе се изградат столчиња на трибините зад головите, па стадионот ќе собира 17.000 гледачи, наместо досегашните 14.000. Ќе бидат изградени двоспратни тоалети на Северната трибина, со кои ќе се опслужуваат англиските навивачи, а ќе се променат и оштетените столчиња на Јужната трибина. Ќе се интервенира и на осветлувањето, чија јачина од сегашните 600 лукса, ќе треба да се доведе до 1.000 лукса, минимум кој го бара УЕФА.