Сообраќајна сигнализација и информативни табли

Грешка во англиската транскрипција на новата ознака и на новото име на досегашниот Градски стадион во Скопје им се поткрала на тие што неодамна ги поставија патоказните табли кон овој спортски објект на скопската улица Илинденска.На таблата текстот на македонски јазик „Национална арена Филип II Македонски“ во англиската верзија излегол како „Nationality Arena Fillip II Macedonian“, што е сосема погрешно. На преведувачите на новите ознаки на стадионот очигледно не им било познато дека англискиот збор „nationality“ се преведува како „националност“, а соодветен збор е „national“.

Професорот Драги Михајловски од Катедрата за англиски јазик на Филолошкиот факултет во Скопје прокоментира дека грешка е направена и при преведувањето на името на Филип II Македонски. Точниот превод е „Philip II of Macedon“, а не „Filip II Macedonian“.

Вчера не беше можно да се дознае кој ја поставил ваквата табла. Во скопското претпријатие „Улици и патишта“ надлежните не можеа да се добијат преку телефон, а во ЈП за стопанисување со станбен и деловен простор, кое го доградува стадионот, изјавија дека таблата не е нивна.Освен преводот, погрешна е македонската верзија бидејќи зборот „арена“ е напишан со голема почетна буква.

Семафорите што треба да го регулираат сообраќајот на крстосницата меѓу улиците Никола Тесла и Орце Николов, во близина на Технолошкиот факултет, и по десет месеци од најавите на Општина Карпош не се поставени. Во близина на локацијата се наместени само соларни панели наменети за семафорите, но од нив ни трага. Овие сообраќајници станаа особено фреквентни откако се изградија нови згради во околината, а по проширувањето на една од улиците настана хаос во сообраќајот бидејќи никој не ги почитува правилата и често пати настануваат судири. Дополнителен проблем имаат и пешаците кои поради брзото возење не се безбедни на улиците, па жителите од населбата Карпош 1 побараа да се постави семафор на крстосницата. - Пред неколку месеци овде имаше тешка сообраќајка со жртви, а речиси секојдневно се случуваат судири. Се вози брзо и поради тоа е сосема небезбедно за минување на улицата. Местото е многу фреквентно, во близина се техничките факултети, гимназијата „Орце Николов“, секојдневно минуваат студенти и ученици. Општината под итно треба да го постави семафорот што ни го ветува со месеци - вели Бранко Николовски, еден од жителите во зградите до крстосницата. Локалните власти минатата година ветија решение со поставување соларни семафори, први од таков вид во општината и во градот. Оттогаш помина речиси цела година, а надлежните од Карпош сега велат дека сите процедури се завршени и сега на потег е ЈП „Улици и патишта“. - Процедурата е завршена, проектот исто така, направивме и анализа за протекот на возила и на пешаци и добивме одобрение од МВР. Сега чекаме секој момент „Улици и патишта“ да излезат на терен и да ги монтираат семафорите. Доставивме допис до нив, тие треба само да направат ископи, да се поврзат инсталациите, така што работите би завршиле за два дена. - објасни Јордан Ангеловски, заменик на в.д. градоначалникот на Карпош. Според него, доцнењето е од административни причини, па неделава семафорите треба да бидат поставени. Од претпријатието „Улици и патишта“, пак, велат дека Секторот на сообраќај на Град Скопје поради ревидирање го вратил проектот за поставување соларни семафори на крстосницата. - Проектот го добивме, но по реакција од Секторот за сообраќај, веројатно поради некоја аномалија, беше вратен во „Инпума“, фирмата која го изработи. Откако ќе биде ревидиран, градските власти ќе го препрати кај нас и потоа можеме да почнеме со работа - вели Илија Мартиновски, директор на „Улици и патишта“.