„Илинденска“ со четири ленти од Влада до Карпош

Градските власти веруваат дека новиот булевар може да се изгради до крајот на следната година

Сања Наумовска


„Илинденска“ ќе се проширува на целиот потег од Владата до раскрсницата со булеварот „8 Септември“ во Карпош. Улицата ќе има четири ленти без средишно зеленило и на до вчера спорниот потег од Владата до фонтаната „Лотос“, за кој градските власти долго време не сакаа да кажат што планираат.

Пред два месеца, поради реализацијата на проектот беше исечен и дрворедот во овој дел, што предизвика револт кај жителите. Тие инсистираа да го видат проектот и тврдеа дека проширувањето би било незаконско, бидејќи Градот нема дозвола за тоа. Тие од градската власт бараа на ова парче од „Илинденска“ да се реализира Генералниот урбанистички план, кој предвидува подземна сообраќајница.

Жителите на „Илинденска“ деновиве реагираа и на раскопаниот тротоар што остана незавршен по поставувањето на атмосферската канализација. Загрижени се поради безбедноста на пешаците, а особено на децата кои го посетуваат Детскиот културен центар „Карпош“. Како што велат, се' уште се во дилема, дали тротоарот ќе се поправи или, пак, ќе се дораскопа поради проширување на улицата.

Сепак, пред два дена градоначалникот Коце Трајановски се изјасни дека и за овој дел од улицата се подготвува урбанистичка документација, која наскоро ќе им ја достави и на градските советници. Според планираното, во двата правци ќе се додаде по уште една сообраќајна лента, на сметка на широкиот тротоар. Тој смета дека целосното проширување на булеварот е од голем интерес за градот, особено за растоварување на сообраќајот во овој дел.

„Во својот мандат ќе инсистирам на изградба и проширување на сообраќајната мрежа, особено на реализација на булеварски решенија. Ќе се размислува и за еднонасочност на некои улици, но само онаму каде што тоа е единственото решение“, вели Трајановски.

На потегот од Владата до фонтаната „Лотос“, поставувањето на атмосферската канализација заврши, а деновиве ќе продолжи кон булеварот „8 Септември“. Проширувањето на сообраќајницата ќе започне веднаш штом ќе бидат решени имотно-правните спорови со сопственици на неколку објекти кои се наоѓаат на трасата. Во близина на влезот на Зоолошката градина и на раскрсницата со „8 Септември“ има четири објекти од кои само еден е легален. Засега, градските власти директно преговараат со сопствениците, но градоначалникот најавува дека доколку не биде најден заеднички јазик, работата ќе заврши на суд, а Градот нивните имоти ќе ги плати онолку колку што ќе ги процени овластен проценител.

Трајановски вели дека моментно, исто така, се испитува дали е возможно и изградбата на потегот од фонтана до Владата да влезе во истиот тендер кој беше распишан за проширувањето кон Карпош. Доколку не е можно, тогаш ќе биде распишана нова јавна набавка и ќе се избере изведувач. Во Градот велат дека за „Илинденска“ има пари, а дел од средствата ќе се предвидуваат и со буџетот за 2010 година. Градските власти оптимистички веруваат дека новиот булевар би можел да се изгради до крајот на следната година.

http://utrinski.com.mk/?ItemID=F785C1CC8569A1469982C344D8067BE2

Цела Илинденска со четири ленти