Железница низ филмови

Во битолскиот монопол ќе се снимаат сцени од собирањето на Евреите и нивната депортација во концентрационите логори и доаѓањето на возот во железничката станица

Дарко Митревски

Во септември се очекува во Битола да бидат снимени делови од филмот „Трето полувреме“ на режисерот Дарко Митревски. Во Битола веќе се разгледуваат локациите за снимањата. Снимањето би требало да заврши во октомври, а ќе се снима на локации во Скопје, Битола и во Охрид.

Во битолскиот монопол ќе се снимаат сцени од собирањето на Евреите и нивната депортација во концентрационите логори и доаѓањето на возот во железничката станица.

Долгонајавуваниот филм на Митревски „Трето полувреме“ комплетно ќе се снима на локации во Македонија. Станува збор за американско-германско-македонска копродукција, кој со вкупниот буџет од 3 милиони евра влегува во групата на високобуџетни филмови. Од Филмскиот фонд на Македонија ја доби максималната поддршка од 500 илјади евра, како и еден милион евра директно од македонската влада, а милион и половина евра се обезбедени од странски продуценти.

Постпродукцијата, која делумно ќе се работи во Германија, а делумно во Канада, се очекува да биде завршена до крајот на годинава, што значи дека филмот комплетно би бил завршен во почетокот на 2012-та. Плановите за понатамошниот живот на филмот се големи и, доколку сé оди според планот, филмот има амбиции да се прикаже и на Берлинскиот филмски фестивал.

Дејството на „Трето полувреме“ се случува во 1942 година и е базирано на автентична приказна за фудбалскиот клуб Македонија, кој бил воден од тренер Евреин, со чија помош тимот успева да го освои шампионатот на тогашната фудбалска лига на фашистичка Бугарија. По казна, тренерот е испратен во концентрационен логор, а фудбалерите од тимот успеваат да го спасат од возот што го носел за „Треблинка“ и го препраќаат во Албанија, каде што се крие неколку години.