Тетовски сообраќај (општо)

Печалбарите го зголемија метежот

Бранот од печалбари пред празниците што го заплисна Тетово го дозголеми секојдневниот сообраќаен метеж, кој е последица на недоизградена сообраќајна инфраструктура. Метежот особено се зголемува пред новогодишните празници и летните одмори, кога драстично се зголемува бројот на автомобили поради доаѓањето на голем број печалбари од странство.

Раководителот на општинскиот Сектор за урбанизам, Скендер Палоши, вели дека причина за сообраќајниот метеж е тоа што ниту еден од трите главни булевари не е пробиен по целата должина, како што е предвидено со урбанистичкиот план. Според него, булеварот Илинденска треба да заврши кај Градскиот стадион, а „Благоја Тоска“ од болницата треба да продолжи до Текстилното училиште. Булеварот Видое Смилевски Бато, познат како „Индустриска“, преку спортскиот центар да се поврзе со регионалниот пат за Јажинце. За реализација, освен финансиски, има и имотно-правни проблеми.

- Меѓу приоритетите за следната година е решавањето на проблемот со „Благоја Тоска“ кај болницата, каде што од 2001 година на реката Пена има современ мост, но од двете страни има повеќе куќи. На страната до градското пазариште процесот на експропријација е прикрај, но од другата страна на реката има пет-шест нови објекти кои треба да се откупат, за што Општината нема доволно средства. Проблемот со „Илинденска“ не може да се реши за една или за две години, но мора да се почне. Тука проблемот е што нема урбанистички планови и веќе е отпочната постапка за носење. Доколку тоа биде завршено во следната година, ќе се почне со изградба - вели Палоши.

Завршувањето на „Илинденска“ може да трае 4 до 5 години, но со тоа би биле решени две третини од проблематичните места низ градот.

- Пробивањето на „Индустриска“ не е приоритет поради обемната работа, не само низ спортскиот центар туку и низ станбените блокови со повеќекатници кои го попречуваат неговото брзо реализирање - вели Палоши.

Според експертите, и овие решенија не ги задоволуваат потребите на Тетово поради неговиот брз развој во последните десетина години.

- Урбанистичките решенија за сообраќајните прашања се пробивање на помали сервисни улици и изградба на кружни текови. Можеби кружните текови не се најдоброто решение бидејќи не се по сите стандарди за нивниот радиус, што треба да овозможи движење и на тешки товарни возила со приколки, но од практичен аспект придонесуваат за растоварување на метежот - смета Палоши.

Проблем во Тетово е и немањето доволен број паркинзи. Таму каде што има јавна површина таа е зафатена со тераси од кафулиња и од кафеани, тезги или други времени објекти. Затоа Општината за следната година планира формирање на јавно претпријатие кое ќе ги стопанисува сите површини што сега и во иднина ќе се користат како паркинг-места. Една од мерките ќе биде и плаќање за паркирање на возилото на централните булевари Илинденска и Илирија.

Од Општината најавуваат продолжување на отстранувањето на гаражите од централното подрачје, што досега беше реализирано во блок 70 и спроти судот.

Атанас Соколовски