Ладење на кров на куќа - Roof cooling

Message Topic Search Topic Options Post Reply Create New Topic Printable Version

   Здраво,

како што некои од вас се сеќаваат (Pbanks ) првпат се вклучив на форумот лани ова време, кога бев во процес на изградба на куќа во Жданец.  Па, куќата бидна лани во Ноември, 6 и пол месеци по удирањето темели, и овде сме веќе 9 месеци, меѓутоа, немав време да направам апдејт, иако требаше . Во меѓувреме, ја проширивме фамилијата, и сега сме комплетни. Како и да е, задоволни сме од се како излезе, зимата ја поминавме супер, за греење се одлучив за чилер со топлинска пумпа, од Aermec, и фенкојлери во сите соби, како и подно во кујна, трпезарија, ходници и купатила, и супер функционираше. Како за споредба, цела зима греев површина од 130м2 на два ката, 24н, и највисоката месечна сметка ми беше во јануари, 10500 денари. Во Март имав проблем со чилерот, кој го сервисираа од Еуротерм во рамки на гаранцијата, и се греев со електричен котел. За споредба, во март, кој беше доста потопол од Јануари, сметката за струја ми беше 16500 денари. Истиот систем го користам и за ладење, кое летово и не го користев премногу, а потрошувачката е незначителна (повеќе струја се троши на машини за перење и сушење).
Е сега, она што можам да го приметам е дека навечер и во текот на ноќта, најтопло ми е во поткровјето, и понекогаш,  морам да го вклучам и ладењето. Ова и немаше да биде толку чудно, затоа што во претходниот стан што го имав, кој беше на поткровје, деноноќно работеше климата за да можеме да функционираме во лето, и поучен од тоа, гледав да ставам добра изолација. И ставив, 15цм тврдо пресуван тервол (го земав преку еден другар од Грција, имаше спецификација од некои 60кг на м3 (другаров го користи за производство на комби плочи од лим и тервол), и стварно мислев дека ќе биде доста ефикасен, и веројатно и е ефикасен, меѓутоа, и тоа не е доволно. Инаку, кровот е од пластифициран лим, кој знае добро да се загрее. 

И сега, размислувам да изнајдам начин да го ладам кровот, па да видам кој какви идеи и сугестии има. Гледам дека има некои решенија со прскалки но и со  продупчена бакарна цевка па сега ме интересира дали да продолжам да размислувам во оваа насока, или едноставно, да го оставам ладењето во текот на ноќта. Ова не ми изгледа како голема инвестиција, но не знам каков би бил ефектот. Некој предлог?

Поздрав,