Како и со што македонските железници влегуваат во Карго 10

09:00 | 22.09.2010 | Автор: Владимир Петрески

Постојано во плановите за стратешката деловна предност, која треба да се обезбеди од оваа компанија, се говори за забрзувањето на транспортот на стоки од Љубљана до Истанбул, што со Македонија нема никаква врска, зашто трасата до Истанбул оди преку Србија и Бугарија. Транспортот по сегментот на Коридорот 10 до Солун е секогаш во втор план. И тоа е нормално зашто времетраењето на транспортот од Љубљана до Истанбул треба да се намали од 57 на 35 часа, додека транспортот од Љубљана до Солун би се намалил за само седум часа.
Понатаму, во изјавите на министрите за транспорт на Словенија, Хрватска и Србија се говори за постигнување брзина од 160 километри на час, па нагоре, со постигнување брзини и над 200 километри на час, нешто што во Македонија е невозможно, дури ни со најновите кредити. Собранието на Македонија даде зелено светло за задолжување кај Европската банка за обнова и развој во висина од 17,6 милиони евра со рок на отплата 15 години и грејс-период од 3 години. Со него ќе се реконструираат

53 км од пругата на делниците: Табановце - Куманово, Миравци - Смоквица, Згроболци - Градско и Градско - Неготино, со што би се создале претпоставки за поголема брзина на возовите од постојните педесетина на над 100 км/час.
Од друга страна, пак, само во последниве 18 месеци Србија доби 200 милиони евра кредити од ЕБОР за модернизација на железничката инфраструктура и тоа само кога станува збор за Коридорот 10. Со последниот кредит државата ќе купи и 15 енергетски ефикасни локомотиви. На веб-сајтот на Европската железничка банка, Еурофима, пишува дека на Србија и стојат на располагање кредити во вредност од 150 милиони швајцарски франци. Од овие пари, 34,5 милиони франци се потрошени за набавка на 10 локомотиви од Русија.
За состојбата во која се наоѓаат железниците во Словенија и во Хрватска нема потреба ниту да се зборува. Словенија има одлично одржувани пруги и постојано го обновува својот возен парк кога станува збор за возовите. Македонските железници своите локомотиви на ремонт ги праќаат токму во Словенија. Хрватска го има „Раде Кончар“, кој произведува современи локомотиви и конкурира за нивна продажба во Германија.
Дури и Босна и Херцеговина изврши набавка на 9 локомотиви и експериментира со брзини на своите пруги од над 200 километри на час. Црна Гора, пак, би сакала да стане дел од алијансата заради релацијата Белград - Бар, но допрва треба да се види како ќе функционира вклучувањето на Македонија, Црна Гора и на Босна и Херцеговина, во ситуација кога протоколот

на новата компанија го потпишаа само првите три земји основачи.
Годишниот приход на „МЖ - транспорт“ се движи од 19,5 милиони евра до 29,3 милиони евра, од кои речиси девет милиони евра или околу една третина одат за плати на околу 1.400 вработени.
- Практично нема никакви вложувања во тоа претпријатие од наша страна, а може да има добар бенефит доколку се продаваат услугите на Коридорот 10, затоа што на оваа траса поминува пругата од Словенија, Хрватска, Србија, нашиот дел од трасата и надолу Грција со која дополнително ќе се разговара дали сака да биде дел од проектот - вели Оливер Деркоски, директорот на „МЖ - транспорт“. И сево ова во ситуација кога кон крајот на минатиот месец пред неговото седиште вработените од него ја бараа платата за јули. Тој, истовремено одговараше и на прашања поврзани со железничката алијанса, препотувајќи се од претходно тешките прашања поврзани со неможноста да се исплатат платите.
За волја на вистината „МЖ - транспорт“ допрва планира со свои пари и со кредити да набави нови моторни гарнитури, електро и дизел, за патнички сообраќај. Во тек е и проектот со Светска банка за опремување со нови мотори на четири локомотиви и за набавка на 36 нови товарни вагони. Но, сево ова е недоволно за рамноправно учество во Карго 10 и заработувачка барем делумна од онаа која ја очекуваат земјите-основачки која треба да изнесува по 50 милиони евра годишно. Особено што директорот Дерковски не мисли дека се неопходни инвестиции за неговата компанија да се наметне како фактор во железничкиот конзорциум. Од друга страна, Србија, на пример, веќе 18 месеци се подготвува на голема врата да го собере кајмакот од овој проект.

http://www.spic.com.mk/kat/biznis/kako-i-so-sto-makedonskite-zeleznici-vleguvaat-vo-kargo-10.html