СЕ ИСТРАЖУВА ЦЕЛА МАKЕДОНИЈА

Дождот го олеснува ископувањето на локалитетите

Дождовите не ги запреа археолошките ископувања во земјава. Напротив, ја омекнаа земја и им помогнаа на археолозите полесно да стигнуваат до културните слоеви во кои се закопани тајните на минатото. Тимовите работат интензивно на античките градови Скупи кај Скопје, во Стоби кај Градско, на Хераклеја Линкестис кај Битола, Стибера кај Чепигово, Градиште кај Свети Николе, каде што се претпоставува дека била пајонската престолнина Билазора и многу други. Некаде веќе се гледаат и првите резултати од ископувањата. Тимот што истражува на Градиште кај кумановското село Младо Нагоричино откри дел од владетелска палата во акрополата на градот. Екипата е предводена од археологот д-р Марјан Јованов, од катедрата за историја на уметност и археологија при Филозофскиот факултет во Скопје. Тие изминатиот еден и пол месец открија дел од репрезентативна владетелска палата од 4 век пред новата ера. Внатрешниот ѕид од палатата бил боен однатре со малтерен премаз. Археолозите открија порта, дел од раноантички јонски капител, амфора.

Скупи над очекувањата

Според д-р Виктор Лилчиќ-Адамс, директор на Управата за заштита на културното наследство, археолошките ископувања во земјава течат според планираното темпо.

- Засега нема одложувања. Археолошките ископувањата се одвиваат главно претпладне кога не врне. Завршуваат околу 14 часот. Попладневните дождови ја омекнуваат земјата и полесно се работи - вели Лилчиќ-Адамс.

Истражувањата на театарот на најстариот урбан дел од Скопје - Скупи, беа меѓу првите што започнаа годинава на територијата на Македонија. Музејот на град Скопје е надлежен за овој локалитет, но проектот го координира Управата за заштита бидејќи истражувањата се во рамките на капиталните проекти што ги финансира Владата. Љубица Kондијанова вели дека дождовите што деновиве го зафатија скопскиот регион не им ги поматило плановите.

- Kога врне, се разбира дека не може да се копа. За среќа, не врне секој ден, па екипите генерално си работат според зацртаните планови. Имаме голем напредок во ископувањето на театарот. Над очекувањата - вели Kондијанова.

И битолчани го почнаа капиталниот проект - истражувањата на западната половина од епископската резиденција. Археологот д-р Аница Ѓорѓиевска, кустос-советник во битолскиот Завод и музеј, вели дека с` се одвива според планот.

Интензивни работилници на Стоби

- Kај нас немаше многу дожд. Во 7 часот наутро сме веќе на терен, а деновиве врнеше попладне. Така, дождот, всушност, ни ја олесни работата - полесно се копа - вели таа.

Археолозите на епископската базилика работат веќе две недели. Полека се оцртуваат ѕидовите од објектот. Во рамките на програмата на својата институција, тие планираат годинава да работат и на некрополата од римско време.

Струмичките археолози пред десетина дена почнаа да ископуваат на Цареви кули. Васил Ѓорѓиев, директор на Заводот за заштита на спомениците на културата и музеј од Струмица, вели дека во овој регион немало многу дождови.

- Малку врнеше деновиве. Веќе работиме на Цареви кули. Дури сега археолозите почнаа полека да ги симнуваат слоевите. Вегетацијата беше многу бујна, па подолго време го чистевме теренот - вели тој.

И овие истражувањата се дел од капиталните проекти. Археолозите од Струмица идниот месец ќе ги продолжат и систематските истражувања на Црвено Поле на планината Огражден, финансирани во рамките на редовната годишна програма на Министерството за култура.

На Стоби веќе се одвиваат интернационалните работилници за конзервација и документација на римска керамика и мозаици што ќе траат до сабота. Наредната недела ќе се одржат и работилници за конзервација на фрески и стаклени садови. Во рамките на работилниците ќе се работи на мозаикот од нартексот на Епископската базилика, а ќе бидат чистени и консолидирани помали парчиња од ѕидната декорација на овој објект. Работилниците се одржуваат петта година и се резултат на соработката меѓу Националната установа „Стоби“ и фондацијата „Балканско наследство“ од Стара Загора.

Весна И. Илиевска

http://dnevnik.mk/?ItemID=18A875E50B9D9344BEE7CBA29B52E159

Златото од Македонија сензационално се најавува во Германија

Златните археолошки предмети од Охрид и од Неготино, конципирани во изложбата „Златните лица на македонските кралеви - Македонците и Kелтите од охридскиот регион - судир на културите“ на 24 јули ќе биде отворена во „Kелтен ромер музеум“ во Манхинг, Германија. Музејот на својата интернет-страница наголемо ја најавува поставката која ќе биде отворена за германската јавност с` до 16 ноември. На плакатот се ставени фотографии од златната маска, ракавицата и прстенот, пронајдени пред дузина години на Горна Порта во Охрид.

Меѓу другото, во најавата пишува:

„За време на археолошките ископувања во некрополата на античкиот Лихнидос, во денешен Охрид, македонскиот археолог Паско Kузман во 2002 година откри гроб од крајот на архајското време до почетокот на класичниот период (крајот на 6 и почетокот на 5 век пред новата ера). Навистина сензационално. Во кралската гробница не бил вклучен само скапоцени накит, туку маска за лице и прстен на раката од лист злато и сребрени сандали. Заедно со богатството на Тремник од хеленистичкиот период, тие претставуваат најскапоцените археолошки богатства на Република Македонија. Овие богатства првпат се претставуваат надвор од Македонија“, пишува во најавата.

С` плаќа Европската Унија

Има вкупно 62 предмета од Заводот за заштита на спомениците на културата од Охрид и од Музејот на Неготино. Изложбата е веќе однесена и наредена во Манхинг.

Престижната изложба уште пред неколку години е договорена на инцијатива на археологот Kузман и неговиот колега од Словенија, Митја Гуштин, во соработка со претставници од германскиот музеј. Изложбата денес ја организира Археолошкиот музеј на Македонија во соработка со музите од Охрид и од Неготино, Приморскиот универзитет од Словенија и со Лошињскиот музеј од Хрватска, а ја финансира Европската Унија, преку Kомисијата за образование, аудиовизуелност и култура.

Според Весела Честоева, директорка на Археолошкиот музеј, ја изложуваме златната доба на Македонија. Освен подготвувањето на изложбата, Европската Унија го финансира осигурувањето и транспортот на предметите до Германија и назад. Обврска на Македонија е само да го подготви каталогот. Kоординатор на нашите институции е Перо Арџанлиев, раководител на одделот за античка археологија во Археолошкиот музеј на Македонија.

Тања Паскали-Бунташеска, директорка на Охридскиот завод и музеј, вели дека од нивната збирка ќе бидат изложени педесетина предмети.

- На оваа изложба ќе бидат претставени најубавите движни археолошки предмети од нашата колекција, меѓу нив се и златната маска, ракавицата со прстенот пронајдени на Горна Порта. Сите тие зборуваат за богатото културно наследство на охридскиот регион - вели таа.

Пред домашната публика на 8 декември

На прашањето кога овие предмети ќе бидат изложени и за македонската публика, со оглед на тоа што не беа дел од археолошката поставка на охридскиот Завод и музеј, Паскали-Бунташеска одговара дека на 17 ноември тие веќе треба да пристигнат во нашата земја, односно во Охрид.

- Ќе бидат свечено изложени на празникот Св. Kлимент Охридски, 8 декември, во златната соба во Kуќата на Робевци, која ја подготвувавме подолго време - вели таа.

Според Драгица Чекоровска, в.д. директорка на неготинскиот музеј, од нивната институција ќе бидат изложени 13 предмети, сите од Орманков гроб, кој во август 2008 година случајно беше пронајден на локалитетот Тремник.

- Ќе бидат изложени еден ѓердан со висулци и две апликации, два ѓердана од мали златни алки, еден златен медалјон со ликот на богот Посејдон, тоалетна кутија - пиксида, две монети на Филип Втори и на Александар Трети Македонски од 4 век пред новата ера и четири фубули (безопасни игли н.з.) - вели Чекоровска.