Катна гаража во барокен стил од 30 метри ќе никне меѓу „Пошта“ и МЕПСО, а ќе чини 8 млн. евра

Деспина Трајковска



Деветкатница во барок што не е барок, распослана на 10.000 квадрати, изградена од бетонски столбови и стакло, со капацитет за паркирање од најмалку 315 возила и тешка дури 8 милиони евра. Ваква ќе биде катната гаража што ќе ја гради идната година Јавното претпријатието за стопанисување со станбен и деловен простор на постојното зеленило помеѓу МЕПСО и „Македонска пошта“ во центарот на Скопје.

Ова, дефинитивно, ќе биде уникатен објект за паркирање во Европа поради фасадата наложена со проектот „Скопје 2014“. Иако старински и естетски испомешан надворешен изглед, објектот внатре ќе биде современ. Паркирањето во него ќе се изведува со лифтови, а освен за основната намена, во објектот ќе има и деловен простор. Предвидени се три бутици, Интернет-кафе, кафе-бар, простор за други угостителски дејности... За комерцијалните содржини ќе бидат „резервирани“ приземјето и првите два ката, а за паркирање вкупно десет, две подземни нивоа и останатите катови.

Владимир Бахчовановски, директор на ЈПССДП, вели оти е рано да се зборува за конечната вредност на објектот, но првичните процени се дека неговата изградба ќе чини најмногу 8 милиони евра.

„Моментно се работи на идејниот проект за оваа гаража, чие идејно решение е дело на Офелија Томиќ, архитектка, избрано на јавен конкурс. Сега тече и изборот за идејните решенија на останатите три катни гаражи. Проценивме дека изградбата на сите четири објекти ќе не' чини околу 30 милиони евра, средства кои во најголем дел планираме да ги обезбедиме преку кредити“, вели Бахчовановски.

Според плановите на претпријатието, сите четири катни гаражи треба да почнат да се градат наредната година и, најверојатно, рокот за изведба ќе им биде 18 месеци. Освен гаражата кај „Пошта“, која ќе биде наводно со барокен стил, останатите три катни гаражи ќе имаат модерни стаклени фасади. И во нив ќе има најмалку по еден кат наменет за деловен простор. Едната од нив ќе се гради кај Работнички дом и таму ќе се пресели ЈПССДП, друга гаража ќе се гради кај „Телеком“ и една од левата страна на Вардар, до Музејот на холокаустот.

Паркирањето во сите објекти ќе се изведува со лифтови, што според надлежните остава простор за поголем капацитет за паркирање. Со овој принцип на паркирање ќе се заштитела и животната средина, бидејќи ќе има мало количество издувни гасови од возилата.

Најпростран, иако не и највисок, ќе биде објектот кај Работнички дом. Постојниот ДУП сега дозволува изградба на четирикатница, но од претпријатието размислуваат да побараат дозвола за дополнителни два ката. Катната гаража кај „Телеком“, пак, ќе има девет ката. По принципот паркирање со лифт во гаражата ќе се овозможи капацитет од 406 паркинг-места. Катната гаража на аголот кај Музејот на холокаустот, според ДУП, налага капацитет од минимум 200 места за паркирање, но тој ќе достигне до 320, бидејќи паркирањето ќе се врши со лифт.

Инаку, локациите на кои ЈПССДП ќе ги гради катните гаражи до неодамна беа државни и требаше да се продаваат на лицитација, но во меѓувреме Владата се премисли и одлучи шест парцели наменети за катни гаражи да ги распредели на станбеното претпријатие и на Градот Скопје. ЈПССДП очигледно изигра подобро, а градските власти, односно ЈП „Градски паркинг“, доби од државата само две гратис-локации за изградба на катни гаражи.

Роза Петкова

Неколку месеци по пропаднатиот тендер за изградба на монтажно паркиралиште на улицата Народен фронт, Општина Центар се уште нема избрано изведувач. Одбрана е само фирма што ќе ја поправи подлогата на постојниот паркинг по целата улица каде што треба да се монтира паркиралиштето на еден кат. Поради тоа, извесно е дека летово, како што беа првичните најави, жителите на Капиштец нема да ја видат готова ни првата фаза од проектот. Од Општина Центар велат дека не се откажале од идејата и дека наскоро ќе изберат фирма што ќе го проектира и изгради паркиралиштето. - Општината веќе направи избор на фирма што ќе ја врши реконструкцијата на подлогата на паркингот, се чека избор на фирма што наскоро ќе ја изработи и постави монтажната конструкција и со нивна заедничка координација ќе се почне реализацијата на проектот - вели портпаролот Јовица Ацковски. Првиот тендер пропадна поради високата цена што ја понудиле пријавените фирми, а според тогашната изјава на градоначалникот Владимир Тодоровиќ, Општината била подготвена да плати сума не повисока од 650.000 евра. Од Општината велат дека во повторениот тендер нема да биде пресудна цената, туку и рокот за изведба. - Дел од условите во постапката за јавна набавка, која се објави по вторпат, се променети, но генералниот концепт на тендерското досие е задржан. Цената сама по себе не е критериум за избор на најповолна понуда, и други услови се пресудни, како гаранција и рок на изведување на работите, така што би извршиле избор на понуда што е економски најповолна и која би се вклопила во проценетата вредност на договорот за јавна набавка - вели Ацковски. Според него, објектот ќе се гради во фази, а годинава се планира да почне и заврши првата фаза или една третина од вкупната планирана површина. Рокот за нејзината изведба е четири месеци, сметано од денот на почнување на градежните работи. Општината планира со паркиралиштето да стопанисува нејзиното јавно претпријатие за паркинзи, а за цените се уште нема решено. Најверојатно, ќе се плаќа привилегирана цена за жителите, а другите посетители ќе плаќаат комерцијална цена. Предвидено е паркиралиштето да се протега на постојната локација за паркирање, на почетокот од Народен фронт до кафе-барот „Интермецо“. Прво ќе се проширува приземјето, каде што ќе може да се сместат околу 250 возила, додека на катот ќе собира уште толку.

http://vreme.com.mk/DesktopDefault.aspx?tabindex=0&tabid=1&EditionID=2052&ArticleID=143259

За две-три години ќе никнат осум катни гаражи

Една од најинтересните катни гаражи е онаа што ќе ја гради Јавното претпријатие за стопанисување со станбен и деловен простор и ќе се наоѓа помеѓу МЕПСО и „Македонски пошти“. Се работи за деветкатница, тешка 8 милиони евра со капацитет за паркирање на најмалку 315 возила. Според својот физички изглед, објектот ќе биде приспособен на проектот „Скопје 2014“, а внатре ќе има и деловен простор - три бутици, интернет-клуб, простор за угостителски дејности...