Градот Скопје денеска /18.03.2011 година/ ја почна изградбата на катната гаража кај паркингот меѓу улицата Мито Хаџивасилев Јасмин и булеварот Македонија. Објектот ќе има два ката под земја и седум ката над земја, со 445 паркинг-места (по 52 места во подземните нивоа и по 60 места на катовите) од коишто 17 паркинг места ќе бидат за лица со посебни потреби. Почетокот на градежните работи на катната гаража го означија градоначалникот на Град Скопје, Коце Трајановски и претседателот на Владата на Република Македонија, Никола Груевски.

- На градежната парцела ќе се изгради интегрално тело со димензии 50,3 х 50,3 метри со висина од 21 метар. Последниот кат е предвиден за угостителство, а на приземјето се предвидени деловни содржини. Пристап кон објектот се предвидува од новопроектираната сервисна улица која ќе биде поврзана со улицата Мито Хаџивасилев Јасмин. За потребите на гаражата се предвидени два влеза и два излеза за возила и два влеза за посетители и корисници на катната гаража. Просторот околу катната гаража партерно ќе се уреди по завршувањето на градежните работи. За изградба на катната гаража Градот Скопје ќе потроши околу 656 милиони денари. На изградба на објектот ќе работат градежниците од ГД „Гранит“ АД Скопје, а рокот на изградба е 2 (две) години – рече градоначалникот Трајановски на стартот на градежните работи на катната гаража.

Вертикалниот транспорт на посетителите е организиран со вертикални комуникации и лифтови, во кои се лоцирани и санитарни јазли за посетителите. Предвидените рампи за возилата се конципирани на тој начин што една рампа ќе се користи само за качување по катовите, а другата рампа само за симнување на возилата. Со ваквиот начин се обезбедува непречено целосно одвоено движење за влез и за излез на возилата. За подземните нивоа предвидени се дополнителни две рампи кои ќе ги опслужуваат само овие нивоа на ист принцип како и другите рампи.

Објектот катна гаража на улицата Мито Хаџивасилев Јасмин е современ објект со модерен систем за греење и за ладење, осветлување и стандарди за противпожарна заштита.

Фасадата на објектот ќе се изработи од префабрикувани алуминиумски елементи поставени на дистанцери оддалечени 50 сантиметри од објектот, од првото до последното ниво. На самата фасада има отвори за природна вентилација на објектот.

Проектот за катната гаража е на група автори - Минас Бакалчев, Митко Хаџи Пуља, Саша Тасиќ, Александар Радевски, Никола Стрезовски и Дамјан Момировски.