Роза Петкова

Метрополата ќе добие уште една катна гаража, овој пат под Кале, во близина на американската амбасада и резиденцијата на архиепископот Стефан. Објектот ќе се гради на левиот брег на Вардар и е предвиден со деталниот урбанистички план на Општина Центар, кој го опфаќа потегот каде што сега има пластеници за цвеќе, полигон за возачи-почетници и дел кој се користи како див пазар на големо. Министерството за транспорт и врски неделава го објави огласот за продажба, со кој се бара инвеститор за парцела со површина од 11.600 квадратни метри. Според ДУП, гаражата ќе има осум подземни нивоа и капацитет од 1.960 возила. Како и останатото државно земјиште, и ова ќе се продава по почетна цена од едно евро за еден квадратен метар, додека на јавното наддавање закажано за 29 овој месец цената ќе може да се зголемува за не помалку од десет денари. За да учествуваат на јавното наддавање, заинтересираните инвеститори ќе треба да уплатат и депозит од околу 71.000 денари. Во согласност со планот, кој е насловен како „Централно зеленило покрај Вардар - Парк 2“, гаражата ќе ги опслужува петте хотели предвидени на таа локација. Двете парцели за хотелските комплекси, на вкупна површина од речиси 20 хектари, се продадоа лани во ноември откако претходните тендери за продажба пропаднаа. Хотелите се распоредени еден до друг покрај брегот на Вардар и три од нив имаат можност да достигнат максимална висина од 14,5 метри, а два од 11 метри, односно да бидат на три и на два ката. Првата парцела ја купи компанијата „Воденица Оне“ по цена од околу 560.000 евра, односно за 2.510 денари за квадратен метар. Втората парцела отиде кај скопјанецот Марјан Јованов, кој плати иста цена. Со претходниот тендер земјиштето за хотели се продаваше со услов фасадите на објектите да бидат барокни и да се вклопат во амбиентот на градбите од блиската околина, односно на административните згради на „Водовод и канализација“ и на Град Скопје, кои наскоро ќе почнат да се градат подолу на истиот брег. Истиот услов изостана во повторниот тендер за продажба на овие локации, а го нема ни во огласот за катната гаража. Во ДУП е предвидено да се изгради спортски комплекс и објектите ќе може да достигнат висина од осум метри. Во комплексот ќе се гради спортско-рекреативна сала, придружни објекти во функција на спортот, отворени спортски терени и привремено сместување.

Роза Петкова


Скопскиот центар, според бројот на жители и предвидени катни гаражи, ќе има повеќе паркинг-места отколку што има центарот на Виена. До ваков заклучок дошло еколошкото здружение „Фронт 21/42“, кое неодамна изработи анализа за урбаниот транспорт во главниот град споредувајќи го со транспортните политики на Загреб, Бања Лука и на Виена. Од Здружението велат дека Скопје, иако стои најслабо со сите други параметри за сообраќај, убедливо води во однос на бројот на планирани катни гаражи. Тие посочуваат дека изградбата на тие објекти, доколку се изградат како вистински гаражи, а не да се претворат во деловни и трговски центри, нема да го реши проблемот со метежот и со паркирањето во метрополата, туку само ќе се зголеми бројот на возила. - Со години се коментира недостигот од паркинг-места и овој став е еден од аргументите за најавените осум катни гаражи во центарот, со околу 3.000 нови паркинг-места. Во моментот во централното подрачје на Скопје има места за паркирање во подземни гаражи или на улица за најмалку 3.000 автомобили, па излегува дека во центарот ќе има најмалку 6.000 паркинг-места. Ова е целосен апсурд. Во споредба со Виена, земајќи ги предвид бројот на жители, моторни возила, паркинг-места во катни гаражи во центарот, бројот на места по автомобил и на крајот и по жител, излегува дека Скопје предвидел повеќе места за паркирање во гаражите на катови иако е помал град. Тоа покажува дека кај нас користењето индивидуални автомобили реално се поттикнува - велат од Здружението во анализата. Според нив, на главниот град му е неопходна стратегија за намалување на бројот на автомобили, со тоа што ќе се намали потребата за нив, а тоа може да се оствари со воведување нови транспортни средства, како трамвај, со кои би се подобрил јавниот градски превоз, и со изградба на квалитетна велосипедска мрежа. Од досега планираните, во центарот на Скопје се изградија катната гаража до НЛБ Тутунска банка со 150 места, деловно-комерцијалниот центар „Зебра“ со 460 места и гаражата на паркингот на „Универзална сала“ на фирмата „Импексел 2“ со 136 места. Катна гаража се гради кај Судска палата, пред поликлиниката „Идадија“, до Цветниот пазар, а со ДУП се предвидени и на локации спроти полициска станица „Беко“, до поранешната зграда на „Нова Македонија“, пред работничкиот дом „Кочо Рацин“, кај Телеком, меѓу Македонска пошта и МЕПСО, до Музејот на холокаустот, под Кале, зад универзитетската библиотека, до „Холидеј ин“ и во близина на „Веро центар“.