Роза Петкова

Катната гаража, која со деталниот урбанистички план „Буњаковец 1“ е планирана да се гради до поранешната зграда на „Нова Македонија“,место да биде со три ката и висина до 12 метри, сега е планирано да има дури девет ката. Во програмите за развој на општина Центар за 2011 година, усвоени на последната седница на Советот, стои дека објектот ќе има две подземни нивоа, приземје и осум надземни нивоа, а деловниот простор што зафаќа 15 проценти од целата градба ќе биде сместен на осмиот и на деветтиот кат. Во ДУП, кој пред една година беше ставен на јавна анкета, првичната висина на гаражата беше три ката. Тогаш составувачите на планот објаснуваа дека гаражата што ќе се гради од страната на „ИК банка“, врз паркиралиштето што порано го користеше ОБСЕ, ќе има иста висина со банката. Се предвидуваше да зафаќа површина од 860 квадратни метри и да собира 140 возила. Со измените што ги направила општината, гаражата ќе има капацитет од 200 возила. Пристапот до неа е замислен преку продолжение на улицата Ленинова, со нов крак, кој ќе ги поврзува улиците Митрополит Теодосиј Гологанов и Мито Хаџивасилев - Јасмин. Од општината велат дека потребата на оваа локација да се направи гаража е близината на „ИК банка“, Министерството за образование и станбените објекти изградени пред повеќе години, кои немаат обезбедено доволен број паркинг-места за станарите. Вкупната цена за изградбата изнесува 3, 3 милиони евра, од кои два милиона ќе се обезбедат со кредит, а другиот дел од продажбата на деловниот простор, кога објектот ќе се изгради до фаза на карабина. Општината планира катната гаража да почне да ја гради в година, а потоа ќе ја даде на управување на своето јавно претпријатие „Паркинзи на општина Центар“. Во непосредна близина на новопланираната гаража се градат или се планираат да се изградат нови простори за паркирање. Преку улица, пред поликлиниката „Идадија“ во тек е изградба на катна гаража за повеќе паркинг-места за административците сместени во зградата на поранешна „Нова Македонија“, а по вторпат ќе се прошири и паркиралиштето на последната станица на автобусот со број 23, а на само неколку метри се наоѓа и деловно-комерцијалниот објект „Зебра“ на компанијата „Тинекс“, кој, исто така, има катна гаража. Освен тоа, по целата должина на улицата Народен фронт, на местото на сегашните паркинзи, ќе се поставува монтажен паркинг на катови, кој беше најавен како предизборно ветување на градоначалникот на Центар, Владимир Тодоровиќ.


Јакимовски ќе гради бесплатни катни гаражи


Градоначалникот на општина Карпош, Стевчо Јакимовски, најавува дека и во неговата општина планира да гради катни гаражи и тоа на три локации, кај Млечниот ресторан, Карпош 1 и Карпош 4.
- Особено сериозен проблем имаме во делот кај Млечниот ресторан, каде што, навистина, нема доволно простор. Ние како општина би ги граделе со парите од граѓаните и потоа инвестицијата ќе им ја вратиме на граѓаните со тоа што услугата во нив нема да се наплаќа – вели Јакимовски, кој не прецизира кога точно би почнала изградбата.

Роза Петкова

 објектот ќе има две подземни нивоа, приземје и осум надземни нивоа, а деловниот простор...ќе биде сместен на осмиот и на деветтиот кат. Се предвидуваше да зафаќа површина од 860 квадратни метри и да собира 140 возила. Со измените што ги направила општината, гаражата ќе има капацитет од 200 возила.

Градот Скопје доби заем од НЛБ Тутунска за изградба на две катни гаражи

Дел од средствата обезбедува Градот од својот буџет, дел од продажба на деловните простории што ќе бидат изградени во рамки на катните гаражи, а дел со кредит од НЛБ Тутунска банка за што денеска беше потпишан договор меѓу Градот Скопје и Банката. Одобрение за кредитот даде и Минситерството за финансии.

Кредитот е во износ од 8,5 милиони евра со рок на отплата од 10 години, грејс период од две години и каматна стапка од еуролибор плус 5,1 отсто. Ова е прв проект на локална самоуправа во кој учествува домашна банка.

Според вицепремиерот и министер за финансии Зоран Ставрески, тој ќе овозможи разавој на инфраструктурата и повеќе паркинг места во централното подрачје на Скопје, отворање нови работни места и се она што значи поквалитетен живот за граѓаните во главниот град.

- Проектот има значење и во контекст на напорите на Владата за поддршка на локалниот развој преку одобрување на вакви позајмици, при што само во текот на оваа година се одобрени 17 позјамици за општините. Дел преку финансирање од странски финансиски инститиуции, а дел од позајмици од буџетот, а еве сега почнуваме и со договори со домашните банки, рече Ставрески.

Истакнувајќи го заначењето на овој договор во контекст на поддршка на домашниот банкарски сектор за локалниот развој, тој оцени дека кредитот од НЛБ  Тутунска е доказ оти домашниот банкарски систем има и сила и разбирање за финансирање на проекти што се значајни за Република Македонија.

- Со ова се отвора врата на еден посилен инвестициски циклус во рамки на општините што ќе биде финансиран од домашните банки. Тоа докажува дека домашните банки поседуваат потенцијал финансиски да го поддржат локалниот економски развој и експертиза и знаење да можат да ги оценат добро проектите кои носат економски развој и кои се профитабилни и можат да бидат одобрени од страна на банката, изјави Ставрески и додаде дека ова ќе биде добар пример и за останатите банки во Македонија да дадат поддршка на локалниот економски развој, како и за покрупни проекти на Владата.

Скопскиот градоначалник Коце Трајановски истакна дека Градот Скопје е една од инститиуциите во Македонија која има висок кредитен рејтинг и оти овој кредит ќе овозможи овој проект да биде навреме реализиран.

- Градот Скопје веќе се задолжува кај две странски банки. Меѓутоа оваа пракса и доверба сметам дека е важен чекор за почеток на инвестирање на домашните банки во локалната самоуправа, рече Трајановски и најави дека со општинските обврзници ќе почнат следната година за да финансираат некој од проектите на Град Скопје.

Директорот на НЛБ Тутунска банка Ѓорѓи Јанчевски истакна дека потпишувањето на денешниот договор е симболичен почеток на учество на банкарскиот сектор во финансирање на проекти од поширок општествен интрес или некој поголем почеток на работење на банкарски сектор со општините.

Се очекува изградбата на катната гража кај Цветен пазар да почне на крајот на јануари следната година, а на другата на „Даме Груев“ на крајот на март или почетокот на април. Предвидено е да бидат готови во 2012 година.