Во Миравци денеска е пуштена во употреба реновираната железничка пруга од Коридорот 10 на делницата Миравци-Смоквица во должина од 12,4 километри.

На настанот присуствуваат министерот за транспорт и врски Миле Јанакиески, генералниот директор на Македонски железници Оливер Дерковски, директорот на „Инфраструктура“ Ирфан Асани и градоначалникот на општина Гевгелија Иван Франгов.

Министерот Јанакиески истакна дека последниот ремонт на пругата е направен пред 43 години и оти денеска оваа делница е целосно реновирана, а во финална фаза е и делницата Табановце-Куманово.

- Ова е само првиот дел од предвидениот ремонт на 55,4 километри пруга на Коридорот 10 со финансиска поддршка од Европската банка за обнова и развој во висина од 17,6 милиони евра, додека вториот дел ќе се состои во ремонт на делницата Ногаевци-Неготино во должина од 31 километар, нагласи Јанакиески.

Директорот на МЖ „Инфраструктура“, Ирфан Асани информира дека ремонтот се состоел од комплетна замена на дотраените дрвени прагови со армирано-бетонски, замена на шините со нови, како и прочистување на стариот толчаник и замена со нов.

- Сега постоечките шест патни премини на овој дел се изработени со горен строј од рециклирана гума и се многу побезбедни при преминување, а исто така и пероните на стојалиштата во Милетково и Стара Смоквица се реконструирани со вградување нови армирано-бетонски елементи, рече Асани.

Со ремонтот на пругата Миравци-Смоквица се овозможува возење со брзина од 100 до 120 километри  на час и поголема сигурноста во железничкиот сообраќај.

http://kurir.mk/makedonija/vesti/132247-Po-43-godini-renovirana-zeleznickata-pruga-od-Miravci-do-Smokvica