Реконструкција на театарот во Гевгелија

Гевгелија, годинешниов град на културата, по речиси 20 години повторно ќе има своја театарска сцена. Љубителите на оваа уметност ќе уживаат во театарските претстави во возобновениот објект, кој ќе биде отворен утревечер (недела), со комедијата "Свадбата на Фигаро", во изведба на актерите од Македонскиот народен театар и во режија на Левен Цуладзе.

"Отворањето на целосно реконструираниот објект на Градскиот театар во Гевгелија е голем празник за театарската уметност во Македонија. МНТ во договор со општина Гевгелија во наредните две години ќе биде постојано присутен на сцената на овој театар, како со претставите така и со техниката. Сметаме дека "Свадбата на Фигаро" е најадекватна за отворањето, бидејќи се работи за хит-претстава, вели Дејан Пројковски, уметнички директор на МНТ.
Проектот е реализиран со финансиска поддршка на Европската комисија од 500.000 евра, додека општина Гевгелија вложи дополнителни над 100.000 евра.

Според градоначалникот на Гевгелија Иван Франгов, театарот бил изграден во 1955 година, но бил прилично оштетен од земјотресот, како и од пожарот кој се случил во 1996 година.
"За почеток на сцената на новиот објект ќе работи аматерски театар, со цел да прерасне во професионален. Исто така, за почеток техниката ќе биде изнајмувана, а веќе за наредната година во буџетот ќе бидат издвоени средства за оваа намена", вели градоначалникот Франгов.
Меѓу гостите кои ќе го проследат отворањето на театарот ќе биде и Мите Грозданов, актер во пензија, кој повеќе од четири децении е чест гостин на гевгелиската сцена, најчесто како режисер.