Обнова на Офицерскиот дом

Живковски: Композицијата на објектот е составена од три волумена кои треба да ги  симболизираат трите периоди на македонската државност –античка Македонија, Самоиловото царство и современа Македонија. Тие треба да го симболизираат континуитетот на македонскиот идентитет и покрај сите неповолни историски околности.

Архитектонскиот стил е избран од повеќе причини. Неопходноста да се изгради и афирмира свеста кај граѓаните дека овој стил не е е туѓ, туку е дел од нашата градителска и естетска традиција.  

ДВЕ ГОДИНИ ПРОЕКТОТ СТОИ НА ХАРТИЈА

Нема ниту цигла од новата Градска куќа

Владата требаше да го обнови Офицерски дом за таму да се смести градската администрација, но тоа сега е заборавено и никој не го споменува, вели градоначалникот Костовски

Нема никаков проект, ни локација, ни идеја за изградба на Градска куќа, која требаше да биде во обновениот Офицерски дом, изјави вчера градоначалникот Трифун Костовски, одговарајќи на советничко прашање на седница на Советот на град Скопје.

- Проектот не е ставен во програмата за оваа година бидејќи градската власт нема финансиска моќ да влегува во една ваква авантура - вели градоначалникот Костовски.Градската куќа, потсети градоначалникот Костовски, требаше да ја прави Владата во центарот на Скопје, но тоа прашање е заборавено и сега повеќе никој не го споменува. Сиве овие години се занимаваме само со реконструкција на бараките за администрацијата да има нормални услови за работа. Мандатот е на минување, а немаме ништо од ветената програма за изградба на Градска куќа - рече градоначалникот Костовски. Според него, Градот не е во можност да влегува во ваков зафат поради тоа што не е спроведена вистинска фискална децентрализација. Барањата на Костовски во овие две години беа во градскиот буџет да се слеваат поголем дел од приходите на скопјани, а не да завршуваат во владината каса или во други општини. За ова градоначалникот веќе спроведе и кампања во корист на градот Скопје, но досега ништо не е сменето.

- Доколку се зголемат приходите во нашата каса, ќе имаме можност сами да го реализираме овој проект - вели скопскиот градоначалник.Наспроти изјавите на градоначалникот, од Министерството за култура пред неколку месеци рекоа дека проектот за обнова на Офицерскиот дом е готов, но не најавија негова изградба за годинава. Годинава не се предвидени пари за да почне да се гради. Во буџетот на Министерството за култура нема ставка со доволно средства за воскреснување на репликата на овој објект, кој беше оштетен, а потоа урнат по земјотресот во 1963 година. Предвидени беа само два милиона денари, односно 32.000 евра.Новиот Офицерски дом, како што најави Владата, треба да биде Градска куќа, односно седиште на градската администрација, која со децении работи во бараки на булеварот Илинден, во Градскиот парк. Во обновениот Дом треба да биде сместена и нова матична служба. Како можен датум за почеток на изградбата беше најавен ланскиот септември, но се' остана само на најава.

Проектот за изградба на Градската куќа на плоштадот Македонија лани по јавниот конкурс му беше вратен на доработка на професорот Коста Мангаровски. Објаснувањето беше дека неговиот предлог не соодветствувал доволно со намената што треба да ја има објектот, како седиште на градските власти. На конкурсот не беше доделена прва награда, затоа што Комисијата оценила дека ниту еден од осумте предлози не ги задоволува барањата за автентичност и за функционалност на објектот. За проектот на Мангаровски беше кажано дека е најдобро решение што потсетува на стариот Офицерски дом.

Јорданка Ивановска