Скопје после земјотресот

http://dnevnik.com.mk/default.asp?itemID=A9B2652768C1AF44B16D7428A3C8B331&arc=1

Датум: 02.05.2012, 16:26

Норитака-Танге: Дали сте среќни во овој град?

Не е на мене да го оценувам барокот, затоа што градот го создаваат луѓето. Важно е како тие се чувствуваат. Вие треба да го знаете одговорот на ова прашање, им порача на скопјани јапонскиот архитект Пол Норитака-Танге, син на светски познатиот архитект Kензо Танге (1913-2005), главен проектант на мастер-планот за центарот на постземјотересно Скопје во 1966 година.

Вие го живеете планот на мојот татко

Иако запрашан за споредба меѓу планираното и оствареното за период од 50 години, тој рече дека нема да одговори, туку ќе им го упати прашањето на луѓето што живеат тука „Дали сте среќни во овој град? Вие го живеете планот на мојот татко, дали ги задоволува вашите потреби. Или треба да го отворите неговиот план од почеток и да го приспособите“.

Норитака прв пат е во посета на метрополата, но и покрај тоа, како што кажа, градот цело време имал значајно место во неговото семејство. Поради тоа и се чувствувал како да доаѓа дома. Беше искрен дека имал ограничено време да разгледа сe, а со тоа да види колку е реализирано од визијата на неговиот татко. Го доживеал од различни аспекти.

Главната визија на јапонскиот архитект Kензо Танге во неговиот мастер-план за постземјотресно Скопје беше изградба на Градски ѕид, 40-метарски кули и 25-метарски ниски згради во „Малиот ринг“, како и Градска порта, која требало да се протега од железничка станица до денешна Народна банка.

Потребите се сменети после 50 години

- Визијата е имплементирана на фин начин. Многу силуети потсетуваат на планот на татко ми, но многу од тоа не е изградено. Можеби во иднина. Сепак, јасно е дека за 50 години потребите се променети. Можеби многу од работите треба да бидат преинтерпретирани и подобро вклопени во денешното општество -посочи синот на јапонскиот архитект.

Норитака е во посета на Скопје по покана на „Американскиот колеџ“, кој во пресрет на 50-годишнината од скопскиот разорен земјотрес и 100 години од раѓањето на Танге, ќе му врачат титула почесен доктор на науки. (Ј.И.)