Општинска зграда Дебар

Од пепелта во Дебар израсна убавица

Новата зграда на општината, која дебарчани ја нарекуваат убавицата, месецов ќе биде вселива, а освен локалната администрација, тука ќе бидат сместени и подрачните единици на министерствата и други институции

Убавицата на градот, како што дебарчани ја нарекуваат новата општинска зграда, набрзо ќе ги добие своите станари. Се финализираат работите, па месецов ќе биде ставена во функција. Освен локалната власт, во новата зграда што се изгради откако во пожар изгоре стариот објект, ќе бидат сместени и подрачните единици на министерствата и други институции.

- Објектот ќе биде во функција на граѓаните, кои на едно место ќе може да ги добиваат услугите. Тие веќе нема да шетаат горе-долу низ Дебар како досега - изјави градоначалникот Аргетим Фида.

Предвидено е да биде воспоставен едношалтерски систем.

- Граѓаните не ќе треба да се познаваат со шефови или со други раководители за да завршат работа. Ќе има контрола на доставени барања и на добиени одговори, на почитување на законот и на времетраењето на обврските, не само на локалната туку и на централната власт - вели Фида.

Услуги тука ќе добиваат не само жителите од општина Дебар туку и од Центар Жупа и дел од Маврово - Ростуше, како што ветува Фида, според европски терк.

И граѓаните се надеваат дека зад нив ќе останат времињата кога за еден документ мораа да одат од едниот до другиот крај на градот, да чекаат со денови, па и со недели.

- Новата општинска зграда ќе ни овозможи да не лутаме таму-ваму. Тоа ни се случуваше и кога беше старата општинска барака, но откако таа изгоре, ние сме на уште поголема мака. Не се знае која служба каде е сместена, постојано се преместуваат - вели Драгана Петревска.

Новата општинска зграда, на која би и' позавиделе и поголеми градови, се наоѓа на местото на старата општинска барака, која беше пеплосана од пожар пред осум години. Објектот располага со 3.400 квадратни метри корисна површина, а за нејзина изградба се потрошени околу 2 милиона евра, од кои половина ги доделени Владата. Во неа, покрај сала за состаноци на Советот на Општината, со апаратура за симултан превод, има канцеларија за пратеникот од оваа општина и други простории.