Авиосообраќај (статистики)

БРОЈОТ НА ПАТНИЦИ ВО 2007 ЗГОЛЕМЕН ЗА 15.5%
4 Јануари 2008 година

Во 2007 година на Аеродромот Александар Велики Скопје беа опслужени вкупно 626,144 патници, односно за 15.5% повеќе од 2006. Ваквиот пораст се должи на воведувањето 6 нови дестинации во текот на 2007 (Париз, Сараево, Келн, Анкона/Верона и Софија), оперирањето на неколку нови превозници на редовни и чартер линии, како и на зголемените неделни фреквенции на досегашните редовни превозници.

Дестинации со најголем број на патници беа традиционалните Цирих и Виена (преку која поминале најмногу трансферни патници), и Истанбул со најголем пораст на патници во однос на 2006. На овие 3 дестинации се превезле вкупно 255,436 патници, односно 40% од вкупниот број на патници во комерцијалната авијација.

 На дестинациите во регионот (Загреб, Љубљана, Белград, како и новите дестинации Сараево и Софија) беа превезени вкупно 143,987 патници, со пораст од 25.1% во споредба со 2006.

Пофреквентни дестинации во 2007 беа и Будимпешта и Прага (преку кои најмногу се трансферира кон Источна и Северна Европа) со вкупно 85,097 патници и покачување од 13.5% во однос на 2006.

На германските дестинации (кои исто така се традиционално фреквентни) Дизелдорф, Хамбург, Берлин и новата дестинација Келн, се превезле вкупно 60,623 патници. На останатите дестинации со редовни линии: Милано, Рим, новата дестинација Анкона/Верона, Амстердам и Париз беа превезени 52,852 патници.

На туристичките дестинации (во Турција, Египет, Грција и Хрватска) во 2007 година беа превезени вкупно 18,326 патници, односно двојно повеќе од претходната година.