Претседателот на Република Македонија Ѓорге Иванов во Македонска Каменица го постави камен-темелникот на новиот плоштад кој ќе се гради во наредниве месеци на површина од 2.540 метри квадратни.

Обраќајќи им се на присутните, Иванов ја истакна заложбата на Владата и ресорните министерства за развој и на помалите општини во Македонија за што, како што рече, секако добар пример е изградбата на спортската сала која за 40-ина дена треба да биде предадена во употреба.

- Плоштадот на кој камен-темелникот го поставуваме денеска се наоѓа јужно од новата црква „Преображение на Пресвета Богородица“. Плоштадот ќе биде поплочен со камен и гранитни плочки, со трибина за седење на 200 лица, мала летна сцена за идните културни настани, рече Иванов.

Ова е најголемата капитална инвестиција во општина Македонска Каменица последниве години за што од буџетот на општината и рудникот „Саса“ ќе бидат финансирани 18 милиони денари.

-Изградбата на градскиот плоштад ќе биде со летна сцена, урбана опрема и фонтана, истакна градоначалникот на Македонска Каменица Дарко Митевски.

Тој истакна дека со оваа и со сите претходни инвестиции, како и со оние што следуваат, општината ќе биде фискално и финансиски стабилна, со што се враќа сјајот во Македонска Каменица.