Очигледно се гледа идеја за распоредот на столчињата - кога ќе биде готов цел стадион ќе се комплетира Сонцето од Кутлеш

Почина градежниот работник од скопската фирма „Бетон“, кој по падот од северната трибина на арената „Филип Втори“ шест дена беше во кома, соопштија вчера од Клиниката за анестезија и реанимација (КАРИЛ). Градежникот, кој завчера попладнето им подлегнал на повредите, на интензивна нега беше примен со тешки повреди на главата и со внатрешно крвавење, а операциите кои му биле направени деновиве не успеале да ја подобрат неговата здравствена состојба. Тој во понеделникот утрото падна од скеле високо околу 15 метри. Трудовата инспекција, која веднаш по инцидентот излезе на терен, на северната трибина затекнала само 80 градежници, иако нивниот број беше поголем. Дознаваме дека вработените во „Бетон“ претходно дознале за инспекциската посета, па на многумина кои не биле со регулиран стаж им било кажано да ја напуштат изградбата. Инспекторите за време на контролата утврдија неправилности во работата на фирмата и дека вработените цел месец работеле без слободен ден. - Инспекторите остануваат на терен и будно ќе ги следат сите случувања до завршување на изградбата на трибината. По целосно комплетирање на истрагата, до Обвинителството ќе поднесеме кривични и прекршочни пријави за вработени во „Бетон“ поради утврдената небезбедност на работниците, при изградбата на трибината “ тврдат од Инспекторатот за труд. Оттаму велат дека работниците и шефовите за време на истрагата за инцидентот имале контрадикторни изјави и додаваат дека поради тоа тие ќе остават Обвинителството да одлучува кој за што е виновен. Градежниците и вчера на температури од 40 степени со полна пареа работеа, а ниту еден од главните луѓе на „Бетон“ не беше достапен да каже како ќе ги решат неправилностите што ги констатирале трудовите инспектори. Многумина коментираа дека се вратило времето на диктаторот Цезар кој по секоја цена инсистирал за кратко време да бидат изградени арените за гладијаторите, при што од исцрпеност починале десетици работници. Од канцеларијата на директорот на фирмата „Бетон“, Коста Глигоровски, веќе неколку дена се правдаат дека тој е на состанок и дека е многу зафатен. По неколкуте инсистирања да го добиеме, секретарката ни спушти слушалка со зборовите: „Јас не можам да ви помогнам“. Одговор за динамиката со која се работи на северната трибина до затворањето на весникот не добивме ниту од Јавното претпријатие за стопанисување со станбен и деловен простор, кое го распиша тендерот за изградба на трибината. И таму неколку пати вчера ни беше објаснувано дека директорот Владимир Бахчовановски е на состанок и не е слободен да даде изјава. Откако со крајни напори успеавме да го добивме на неговиот мобилен телефон, тој не упати на неговата електронска адреса, каде што побара да му ги испратиме прашања, со образложение дека доколку биде слободен ќе ги одговори. - За изградбата на северната трибина е задолжен „Бетон“, а во договорот што го потпишавме, прецизно се одредени динамиката за работа и датумот до кога треба да биде завршена изградбата “ кратко ни изјави Бахчовановски, кој моментно беше на состанок во Министерството за транспорт и врски. Останува дилемата дали навременото пуштање на северната трибина од стадионот, ќе се одрази врз здравјето на градежните работници, кои повеќе од еден месец се без слободен ден, а „Бетон“ не им ги исплаќал ниту вишокот од десет часа неделно за работа на екстремно високи температури.