Телеком арена (арена Филип II Македонски)

Има уште многу работа на „Филип Втори“

Околу 90 отсто од изградбата на Северната трибина на стадионот „Филип Втори“ во Скопје е завршена, пред пријателскиот натпревар со фудбалската репрезентација на Шпанија на 12 август. Останатиот дел од работата на стадионот ќе се заврши во следните четири години, велат од Јавното претпријатие за стопанисување со станбен и деловен простор. Владата донела одлука во следните четири години целосно да ги реновира и западната и источната трибина, целосно да ја реконструира јужната трибина и да го промени теренот со нова тартан-патека, дренажа и грејачи.

- Изградбата е завршена со 90 проценти, но опремата е само делумно донесена, па од финансиски аспект може да се каже дека реализацијата е до половина - истакна Зоран Мисовски, директорот на секторот за градба при ЈПССДП.

По четири години арената „Филип Втори“ ќе има капацитет од 36.400 гледачи. Во моментов на северната трибина се комплетирани 10.000 седишта, од кои 9.303 за гледачи, 456 за ВИП и 248 за новинари. Јужната трибина со реконструкцијата ќе се зголеми од 11.477 на 12.000 места, а Исток и Запад ќе прибираат по 7.152 гледачи.

Според она што го виде „Дневник“, ВИП-ложата е со кожени седишта, а видните личности до таму нема да одат по скали, туку со посебен лифт, кој веќе е тестиран од работниците. ТВ и радиокоментаторите ќе имаат можност да работат на 22 места во затворени студија.

ПОДОБРО ЗА ФУДБАЛЕРИТЕ

Мошне подобрени услови ќе имаат фудбалерите, за кои во поттрибинскиот простор е изградена интерна улица, по која може да се движат само официјалните возила и да ги избегнуваат мешаниците и опасностите. Резервните играчи и тренерите на средбата со Шпанија ќе седат на клупите во старите боксови до теренот кај јужната трибина. Но во наредниот период фудбалерите, по примерот на модерните стадиони, ќе се симнуваат по скали во поттрибинскиот простор на север.

Туш-кабините се' уште се градат, а соблекувалните се речиси готови. „Шминкањата“ со фасада и тревници не се ни започнати, чакалот и прашината наголемо се присутни, но значителни проблеми и натаму треба да се решат. Двата влезно-излезни моста за северната трибина излегуваат на кејот на Вардар, па гледачите ќе треба да се „туткаат“ на пешачката патека и да чекаат на насипот, а дополнителен притисок создава нелегалната градба позната како „Кинески ѕид“. Патеката мора да се прошири во иднина до 8 метри за да постои комоција - признава одговорниот Мисовски.

ПАРКИНГ НИ ЗА ЛЕК

Паркинг ќе нема ни за лек, а допрва треба да започне подигнување на катна гаража на другата страна на Вардар, кај стариот автополигон. Во ЈПССДП велат дека градоначалникот Коце Трајановски се понудил со изградба на мост дотаму.

Многу позгодно ќе и' биде на публиката при непосредното следење на мечот. Рефлекторите ќе снабдуваат светлина од 1.600 лукса при минимална норма на УЕФА од 1.500 лукса. Покривот е изграден од поликарбонат и дава многу попријатно чувство, за разлика од масивната градба на јужната страна. Озвучувањето е поставено на покривот, така што посебни служби се погрижиле за подобра акустика за гледачите. Низ 12 излези од трибината, пресметано е празнење на гледалиштето за 7,5 минути.

- Препораките на УЕФА се од една трибина да може гледачите да излезат за максимум 12 минути, а ние сме подобри за 4,5 - наведе Мисовски.Безбедноста е на високо ниво, постојат скалила за вонредни ситуации што водат кон теренот, а при сите служби постои и амбулантна просторија за медицинска помош на присутните. Се тестира и новиот сопствен генератор, кој во вонредна ситуација со 350 киловати би го снабдил со струја целиот стадион.

Проблемот со семафорите ќе се решава со веќе распишан тендер, но поставувањето бара време. Два ќе бидат поставени на источна и западна трибина со димензии од 16 на 8 метри и дисплеј од 100 квадратни метри.

Државата ќе менаџира со поттрибинскиот простор

Владата одлучи самата да го менаџира поттрибинскиот простор и да не го дава под концесија на стопанственик што би се грижел за комерцијалните услуги под пазарни услови. Таа ќе формира посебно акционерско друштво составено од членови на разни јавни субјекти кои ќе раководат со просторијата за кардио-фитнес, канцелариите, кафетеријата, салонот за убавина, апартманите, салата за состаноци, џакузи и друго.

Александар Кузмановски