Телеком арена (арена Филип II Македонски)

ОТКАКО ВЛАДАТА ГО СКАСТРИ БУЏЕТОТ

Нема пари за источната и за западната трибина

Северната трибина на Градскиот стадион ќе биде доградена, а за источната и за западната ќе има пари само да се почне изградбата

Со пакетот мерки за надминување на економската криза, кој премиерот Никола Груевски го најави завчера, ќе се скуси буџетот за изградба на Градскиот стадион. Од Министерството за финансии и од Јавното претпријатие за стопанисување со станбен и деловен простор објаснуваат дека со кратењето на средствата за изградба на стадионот не значи дека ќе запрат градежните активности во Градскиот парк, но дека тие ќе се одвиваат со намалена динамика. Надлежните од овие институции објаснуваат дека изградбата на северната трибина ќе продолжи со предвиденото темпо, бидејќи буџетот од околу 900 милиони денари за нејзино завршување нема да се чепка.
"Северната трибина се работи и треба да заврши до крајот на август оваа година. Во годинешниот буџет беа предвидени околу 15 милиони евра за изградба на западната и на источната трибина и скусувањата се однесуваат на оваа ставка. Сепак, ќе останат доволно средства за да почне нивната изградба, бидејќи во тек е тендер за избор на изведувач и за овие делови од стадионот. До крајот на јули треба да заврши тендерската постапка и да се потпише договор со изведувачот, по што очекуваме да почнат градежните активности, но ќе се одвиваат со намалена динамика", велат од ЈП за стопанисување со станбен и деловен простор.
И Министерството за транспорт и врски уверува дека кастрењето на буџетот нема да го доведе во прашање проектот за набавка на 302 двокатни автобуси за обнова на возниот парк на ЈСП "Скопје. Надлежните од Министерството велат дека нема да го поништат тендерот што го распишаа минатиот месец, и покрај тоа што со владините антикризни мерки годинава буџетот за набавка на автобусите е намален за околу 190 милиони денари. Тие објаснуваат дека скратувањето на средствата ќе се одрази само на роковите за плаќање на автобусите, кои ќе бидат продолжени.