Во Грција се води истрага против градежната компанија „Актор“, која го гради автопатот Демир Капија – Смоквица, за наводен поткуп на официјални претставници од Македонија за да го добијат договорот, открива најновиот извештај на Организацијата за економска соработка и развој – ОЕЦД , за борбата со корупцијата во Грција.

Грчка градежна компанија наводно понудила поткуп на официјални претставници од БЈРМ за да го добијат договорот вреден 270 милиони евра за изградба на автопат во таа земја, објави телевизија Телма.

Градежните работи почнаа во септември 2012. Грчката компанија го доби договорот иако нејзината понуда беше значително повисока – околу 40 милиони евра , од понудите на конкурентите. Вклучени се филијала на грчката компанија во БЈРМ и поединци од Грција" – пишува во извештајот.

Во него се вели дека за покренатата истрага Атина побарала помош и од Скопје, но бидејќи не дообила одговор, побарала посредување и на Еуроџаст:

„Во Грција е во тек прелиминарна истрага за поткуп на странци и перење на пари. Грција побара правна помош во јуни 2014 од БЈРМ. Додека го чекаат одговорот на оваа барање, грчките власти ги контактираа своите партнери од Еуроџаст за да посредуваат во барањето„.

Во Извештајот, што го пренесува и грчки Катимерини, случајот е посочен како еден од седумте во кои грчки бизнисмени поткупувале службени лица во Македонија, САД, Оман, Кипар и Алжир за да добијат одредени бизниси.

ОЕЦД ја критикува Грција дека не превзема доволно мерки за истрага во вакви случаи и дека најголем дел од нив, тамошното обвинителство ги покренало по претходни пишувања на медиумите.

Против „Актор“ предкривична истрага отвори и македонското обвинителство, откако лани во Март на прес конференција опозицискиот СДСМ обвини за незаконско подигање милионски суми во кеш од сметката на фирмата од банка во Неготино.

За сомнителни трансакции до обвинителството извештај достави и Управата за спречување на перење пари.

Како дел од истрагата беа блокирани, па деблокирани сметки на две фирми. Како заврши истрагата на обвинителството информација нема.

Како што објави телевизијата, во извештајот, објавен на 15 март, се споменува уште еден случај на грчко-македонски коруптивни врски - поткупот во Телеком. ОЕЦД ја критикува Грција дека не презела никаква истрага, и покрај, како што се вели, „добро познатите поединци" кои посредувале во поткупот.

http://www.mkd.mk/makedonija/ekonomija/aktor-pod-istraga-za-tenderot-za-izgradba-na-avtopat