Реконструкцијата на делот од булеварот во близината на соборниот храм зависи од тоа колку пари ќе има градот за идната година

Со првото проширување на булеварот беа опфатени 500 метри од сообраќајницата

Проширувањето на еден крак од булеварот Свети Климент Охридски, поточно делот во близината на соборниот храм, ќе ја чека идната година. Потегот од раскрсницата со булеварот Партизански одреди до булеварот Илинден во големата реконструкција на овој булевар остана нечепнат. Од градот не прецизираат кога ќе заврши целиот проект, ниту дали тој ќе зависи од проектот за изградба на тунел под Кале.

- Втората фаза од проширувањето на булеварот Свети Климент Охридски ќе се реализира во текот на наредната година и сите детали ќе се знаат по усвојувањето на буџетот за 2012 година, како и по спроведувањето на јавните набавки за реализација на овој проект - информираат од одделението за односи со јавноста при градот Скопје.

На последната седница на советот на градот, градоначалникот Коце Трајановски истакна дека меѓу приоритетите на градот во надминување на сообраќајните проблеми, покрај изградбата на подземната сообраќајница на кејот на Вардар, е и изградбата на нов мост преку Вардар и тунел низ Калето со кој скопјани ќе добијат ново поврзување.

- Втор приоритет во сообраќајните решенија на градот е доизградбата на булеварот Свети Климент Охридски. Се чека изработката на деталниот план на општината Центар, со кој еден крак ќе биде опфатен и ќе може да се гради новата сообраќајница - објаснуваше градоначалникот Коце Трајановски.

Со првото проширување на булеварот беа опфатени 500 метри од сообраќајницата, на која беше направена уште една коловозна лента во двете насоки, за сметка на средишното зеленило. Сега Свети Климент Охридски има по три коловозни ленти широки по 3,5 метри, средишно зеленило и нови тротоари со бекатон-плочки. На веќе проширениот дел од булеварот е предвидено да се засадат околу 60 јавори, но никој не соопштува кога ќе се случи тоа. Досега градот за овој зафат потроши 29 милиони денари.
Според експертите за сообраќај, новите сообраќајници значително ќе го подобрат сообраќајниот проток на автомобили во главниот град.

- Секое сообраќајно решение што ќе ги намали метежите во градот или по улиците е апсолутно пожелно и потребно. Зголемениот број на возила доведува до непријатни ситуации, а зголемениот проток на возила ја намалува безбедноста на сите учесници. Ние како институција ги поздравуваме сите напори да се зголеми бројот на сообраќајници и да се донесат иновативни решенија за растоварување на сообраќајот - вели Тоше Јанев, портпарол на Републичкиот совет за безбедност на сообраќајот на патиштата.