Владата на Република Македонија секоја година донесува Програма за изградба и одржување на станови сопственост на Република Македонија. Согласно оваа програма, предвидена е изградба на вкупно 22 објекти со вкупно 1.712 социјални станови кои ќе се градат на различни локации во државата. Во оваа насока, Министерството за транспорт и врски успеа, преку Банката за развој при Советот на Европа, да обезбеди кредит во висина од 23,3 милиони евра за реализација на проектот за социјално-ранливите групи. Исто така, сакам да истакнам дека со воведувањето на електронскиот начин на дистрибуција на социјалните станови пред две години, Министерството за транспорт и врски воведе нови, високи стандарди во борбата против корупцијата, модернизирајќи го процесот на пријавување и дистрибуција на социјалните станови, со што максимално го елиминира човечкиот фактор, а со тоа и можностите за коруптивно дејствување. Со овој начин на распределба се потврдува темелниот постулат на Министерството за транспорт и врски во социјалната политика – само оние граѓани кои навистина ги исполнуваат критериумите, да добијат стан, притоа целосно исклучувајќи го човековиот фактор во процесот на распределба. Незадоволствата што доаѓаат од страна на граѓаните се резултат на тоа што постои многу голем интерес кај граѓаните отколку што има расположливи станови, и ние тоа многу добро го разбираме. Што се однесува до комерцијалните станови, кои се предвидени со програмата за изградба и одржување на станбениот простор во сопственост на Република Македонија, во тек е изградбата на 4 објекти со повеќе од 300 станови, а предвидена е изградба на дополнителни 168 станови во Скопје, како и повеќе од 300 станови наменети за станбено необезбедени лица. Со реализирање на предвидените проекти, односно изградбата на станбените згради ќе се овозможи и дополнителен простор за домување со конкурентни цени што дополнително ќе доведе до стимулирање на конкуренцијата во областа на недвижностите.