Еден милион евра за консултанти

Градската власт освен за подземни сообраќајници и за Луна-парк, за кои ќе плати 400.000 евра, допрва ќе потпишува уште три нови - за ски-патеки, за билборди и за трамвајот, а секој чини по околу 200 илјади евра

Градската власт пред некој ден потпиша договори во висина од 400.000 евра за консултантски услуги за подземни сообраќајници и за Луна-паркот, но сепак сумата за некое време ќе достаса до еден милион евра. Приказната за користење на, како што велат од Градот - експертски услуги - не завршува само со овие два договора. Допрва, како што изминатава година најавија градските власти, ќе се потпишуваат и нови, и тоа со консултанти за планираната скијачка патека на Водно, за трамвајот, како и за доделување под концесија локации за билборди. До сумата од милион евра се доаѓа ако се земе предвид дека еден договор е околу 200.000 евра. Иако беа запрашани, од Градот не одговорија дали и другите три договора ќе чинат по четврт милион евра.

Фирмите-консултанти ќе бидат задолжени на градоначалникот да му дадат мислење дали некој проект е исплатлив за реализација и каде да најде пари за реализација. Тоа само по себе не значи дека градската власт по автоматизам ќе се одлучи за спроведување на сугестиите од консултантите во дело.

Опозицијата изминатава година, кога на дневен ред се наоѓаа овие точки, жестоко реагираше на предлозите на Трајановски да најмува експерти од страна, кога има сектори во кои работат стотици вработени што би му ги дале одговорите за кои плаќа 200.000 евра.

- Можеби е време Антикорупциската комисија да ја испита навиката на Градот да најмува консултанти за се' и сешто и да ни дадат одговор дали нешто од тоа служи и за полнење на партиската каса - е ставот на Софија Куновска, координатор на СДСМ.

Од Градот велат дека за сите проекти за најмување консултант имале консензус од сите советнички групи на политичките партии во Советот. Членови на Совет се вкупно 45. Коалицијата на ВМРО-ДПМНЕ - 19, ВМРО-Народна - 2, СДСМ - 11, ЛДП - 3, ДУИ - 5, ДПА - 3, и по еден Сојузот на Титови леви сили и група на независни избирачи.

Опозицискиот СДСМ изминатава година секојпат кога на дневен ред на Советот на Скопје ќе се најдеше точка за најмување консултант, го прозиваа градоначалникот за расипништво и неумеењето да ги одреди вистинските приоритети. Воедно советниците и не гласаа или пак во знак на протест ја напуштаа седницата.

- Потребата за ангажирање консултантски куќи за проекти ја утврдува Советот на Град Скопје со носење одлуки. Досегашните одлуки се донесени со консензус на сите советнички групи на политичките партии. Конкретно, одлуката за консултант за подземните сообраќајници е донесена со 35 гласа за и еден воздржан и ниту еден глас против - изјавија од Одделението за односи со јавноста.

Од Градот одговорија дека „вредноста на консултантските услуги се утврдува со избор на најповолна понуда, избрана по пат на јавна набавка, според позитивната регулатива во Македонија“

И поранешниот градоначалник на Скопје, Трифун Костовски, запрашан што мисли за сегашните идеи на Трајановски, во медиумите изјави дека не се согласува да се вложуваат 400 илјади евра за консултации. Напротив, неговата препорака е да се почне со реализацијата на проектот со трамвајот, за кој, според него, сите студии се веќе завршени.