Вести

ИВИЦА КОНЕВСКИ, ГРАДОНАЧАЛНИК НА АЕРОДРОМ

Аеродром во градежна офанзива

Се надевам дека до 2014 година општината ќе добие нов и поинаков сјај. Основа за тоа даваат многубројните почнати проекти и тие што допрва ќе почнат, вели градоначалникот Коневски

Општина Аеродром е во градежна офанзива. Дури се зборува дека како пандан на владиниот проект „Скопје 2014“, општината подготвува проект „Аеродром 2014“. Во интервјуто за „Дневник“ градоначалникот Ивица Коневски вели дека не постои таков проект, но се надева дека до 2014 година општината ќе добие нов и поинаков сјај. Основа за тоа даваат многубројните почнати проекти и тие што допрва ќе почнат.

Веќе се градат спортски терени во Општината. Што се гради и кога граѓаните ќе го почувствуваат благодатот од овој проект?

- Во Аеродром живеат многу млади луѓе. Сакаме да им овозможиме услови тие да живеат и да се развиваат во здрава средина. Затоа ставаме посебен акцент на изградба на спортски терени. Почнавме со изградба на фудбалско игралиште во Реонскиот центар „Аеродром“, четири тениски и едно фудбалско игралиште покрај Кејот на Вардар во близина на спортската сала „Јане Сандански“, четири фудбалски игралишта во рамките на проектот „Куќа на фудбалот“ во близина на мостот „Близнак“ и две помали спортски игралишта за мал фудбал и кошарка. Сите овие спортски терени граѓаните ќе може да ги користат идната година, кога очекуваме да заврши нивната изградба.

Граѓаните што живеат во близина на градилиштата велат оти изведувачите не го почитуваат Законот за градба. Со камиони и возила булеварите ги валкаат со кал, градилиштата не се оградени, ниту имаат информативна табла што се гради. Зошто досега комуналните инспектори не го решиле овој проблем?

- Општинската инспекција веќе презема мерки во таа насока. Во иднина ќе мора повеќе да се внимава при изведувањето на градежните работи.

Во општината се' уште постојат населби без фекална канализација. Пред Реонскиот центар има големи неуредени површини, спроти трговскиот центар „Бисер“ има неурбанизирани неколку стотици квадратни метри. Може ли општината да се нарече урбано, модерно и посакувано место за живеење покрај овие комунални недоречености?

- Речиси сите проекти што ги работиме се во насока на подобрување на квалитетот на живеење на сите граѓани, кои заслужуваат еднакво добри услови во сите населби од Општината. Затоа вложуваме максимални напори да се доизгради фекална канализација на оние неколку места во руралниот дел од Општината, на кои, за жал, досега немало ваква инфраструктура. Што се однесува до хортикултурното уредување на новоизградената населба Реонски центар „Аеродром“, тоа е веќе почнато на местата предвидени за парковско зеленило. Во истата населба почнавме да градиме фудбалско игралиште, но и нова детска градинка. Изградивме дел од инфраструктурата што недостигаше, а наскоро ќе почне изградба и на ново основно училиште. Единствено земјени површини, на кои е предвидена изградба на станбени згради, нема да се уредуваат хортикултурно, како ни локацијата спроти ТЦ „Бисер“, бидејќи таму ќе се гради нов трговски центар.

Со воведувањето на зонското паркирање, дел од сообраќајниот хаос се реши, но граѓаните од булеварот Јане Сандански имаат проблем со паркинг-место. Како ќе го решите недостигот од паркинг-простор?

- Зонското паркирање се покажа како единствено разумно решение за сообраќајниот хаос околу ТЦ „Бисер“ и „Веро“. Знам дека сега граѓаните што живеат отспротива и кориостат бесплатен паркинг поради напливот на други граѓани сега немаат место за паркинг. Дел од куќните совети од околните згради сега бараат да се воведе и таму зонско паркирање, но поради големиот број возила, а малата површина за паркирање, тоа е невозможно. За еден месец ќе почнеме со подготовка за поставување на монтажни паркинзи во тој дел за да ги надминеме и овие проблеми.

Дел од родителите чии деца учат во основните училишта се жалат на неуредените, неоградените и небезбедните училишни дворови, како и на недостигот од клупи и столчиња. Бараат на големите и неискористени училишни дворови да се изгради рекреативен базен за учениците. Што мислите за иницијативата на родителите?

- Општина Аеродром вложува максимални напори за подобрување на условите за настава во образовните институции: менуваме азбестни покриви, поставуваме клупи во училишните дворови, во некои градинки се менува оградата, градиме кошови, детски и спортски игралишта. Општината ќе продолжи во своето работење да им посветува особено внимание на децата. Инаку, сметаме дека е посоодветно да се изгради базен што ќе го користат повеќе граѓани, а не само учениците од едно училиште, така што предвидовме базен во Детаљниот план покрај Кејот на Вардар, за кој се надевам дека ќе почне да се гради во наредните години во соработка со Агенцијата за млади и спорт.

Пред речиси една година при донесувањето на детаљните урбанистички планови им дозволивте на граѓаните што живеат во таканаречените воени бараки да си најдат инвеститори и да градат станбени објекти. На терен не се случува ништо, а граѓаните се незадоволни и разочарани. Зошто тој проект е сопрен?

- Општината им излезе во пресрет на тие граѓани и го донесе Детаљниот урбанистички план за тој дел. Се заложивме да им помогнеме на граѓаните да си го откупат земјиштето за да можат да добијат бенефит од овој проект. Во меѓувреме, Владата донесе Закон за откуп на земјиштето, но за земјиштето на таа локација корисничко право има ЈПССДП. Секторот за имотно-правни работи во Министерството за финансии работи на одземање на корисничкото право и се надевам дека до крајот на годинава и овој проблем ќе биде решен на обострано задоволство и интерес и за граѓаните и за Општина Аеродром бидејќи на тој начин ќе се слеат средства во општинската каса преку наплата на комуналиите.
Итно е потребно сообраќајно поврзување на Аеродром и Кисела Вода. Размислувате ли за решение за овој проблем?

- Секако дека се размислува за поврзување на општините Аеродром и Кисела Вода, но сметаме дека прво треба да се овозможат услови за реализирање на оваа идеја. За таа цел, општина Аеродром го донесе ДУП „Индустриска зона Б“, со кој се предвидува изградба на подземен премин. Се надевам дека во соработка со Општина Кисела Вода и со другите надлежни институции ова ќе се реализира.