Јужен булевар под земја. Никнува ли уште една афера или деловен центар?

Подземен „Јужен булевар“, надземен деловен комплекс

За СДСМ, новиот ДУП „Стара железничка станица“ е спротивен на ГУП

Сања Наумовска

Обновување на урнатиот објект на Старата железничка станица во својот автентичен изглед како што беше пред земјотресот во 1963 година, предвидува Деталниот урбанистички план „Стара железничка станица“, кој вчера се најде пред советниците на Општина Центар. Обновената железничка станица ќе биде влез во нов деловно-административен комплекс, долг околу 1 километар, кој ќе се гради меѓу железничката и неизградениот хотел „Радисон“, на местото каде што сега поминува „Јужниот булевар“. Сообраќајницата, пак, според ДУП, ќе треба да се премести под земја, а ќе биде врзана со постојната сообраќајна мрежа преку нови три кружни сообраќајници, ротонди.

За советничката група на СДСМ во Општина Центар, ДУП „Стара железничка станица“ е спротивен на Генералниот план на Скопје. Опозиционерите од СДСМ се повикаа на препораката од Асоцијацијата на архитекти, која предлага одложување на расправата за планот и побараа симнување на точката од дневен ред, но мнозинството во Советот го отфрли предлогот и точката, сепак, остана на дневен ред.

„Изградбата на комерцијални објекти врз вкопаниот „Јужен булевар“ е спротивно со ГУП, каде што воопшто не се предвидуваат никакви градби врз сообраќајницата“, вели Јован Тагасовски, советник на СДСМ во Општина Центар. За разлика од она што го предвидува ГУП, Деталниот план што се разгледува ќе дозволи изградба на 152.000 квадратни метри објекти со различна намена. Изградбата на подземниот коридор на „Јужен булевар“, според него, е условена со паралелана изградба и на сите сервисни улици и на остатокот од сообраќајницата во правец на Карпош за да може воопшто булеварот да биде функционален.

Подземното парче на „Јужен булевар“ е предвидено и во Генералниот урбанистички план и би требало да биде прв подземен булевар во градот.

Сепак, неизвесно е кој ќе го гради, бидејќи македонските градежни компании не поседуваат механизација за вакви сложени зафати. Една од опциите, како што најави градоначалникот на Скопје, Коце Трајановски за „Утрински весник“ во ноември минатата година, е партнерство со приватна компанија што би ја направила улицата, а за возврат би добила еден деловен објект во комплексот.

Имено, Град Скопје лани во февруари потпиша меморандум за соработка со градежната фирма „ГЕММА груп“, која е застапник на англиска корпорација заинтересирана за изградба на сообраќајницата и на комплексот. Во Градот велат дека немаат ништо против да гради приватен партнер, но дефинитивната одлука ќе треба да ја донесе Министерството за транспорт и врски, бидејќи станува збор за државно земјиште.

„За нас е прифатливо фирма да го направи делот од „Јужен булевар“, пред се', поради финансискиот интерес. Тоа им беше кажано и на претставниците на ’Гема’, со кои потпишавме меморандум за соработка. Но, има многу заинтересирани, па онаа фирма која ќе ја добие локацијата, ќе има обврска да го изгради и тој дел од булеварот“, информираше Трајановски.

Комплексот, според Деталниот план, ќе биде висок 16 метри и ќе има 4 ката, односно приземје, два ката и потпокрив. Дел од просториите се наменети за комерцијални дејности. Во продолжение на двата краја на комплексот се предвидуваат катни гаражи што ќе бидат сообраќајно врзани со подземното парче на „Јужен булевар“. Улицата ќе биде широка 31,5 метри, од кои по две ленти од по 3,75 метри во двата правца, две ленти по 3 метри наменети за застанување на возилата. Во средината би требало да се смести и коридор за трамвајска пруга.

На ниво на постојната сообраќајна мрежа, новиот објект ќе се поврзе со три ротонди. Два помали кружни тека ќе се градат на местото на надвозникот, кој ќе се урива. Со едната ќе се врзат улиците „Мито Хаџивасилев-Јасмин“ и „Кочо Рацин“, а со втората „Железничка“ и „Бихаќска“. На другата страна на комплексот ќе се гради голема ротонда што ќе го регулира сообраќајот на раскрсницата на улиците „Мито Хаџивасилев-Јасмин“ и „Железничка“ со „Свети Климент Охридски“, „Водњанска“ и „Васил Ѓоргов“.

Асоцијацијата на архитекти во дописот што го испрати до градоначалникот на Центар, Владимир Тодоровиќ, ја критикува идејата за измена на објектот на Старата железничка станица поради тоа што со предлогот не се почитува колективната меморија за уникатноста на објектот, кој е симбол на солидарноста, како и поради непридржување до режимот на заштита на објектот и на неговата непосредна околина.

Даниела Трајковска

Жителите на Дебар Маало ќе го добијат своето место за изградба на црквата „Света Ана“, ама и инвеститор кој сакаше да гради зграда на истото место, доби помала маркица, па така, наместо седумкатница, сега тој ќе гради петкатница. Од општината велат дека одлуката на Тодоровиќ била во интерес на граѓаните. Но, ваквата промена уследи откога излезе планот на општина Центар, дека во предвидениот Детален урбанистички план (ДУП), на локацијата наменета за црква, беше предвидено да се гради голема зграда, па жителите сериозно се побунија и се закануваа дека нема да го дадат плацот за изградба на зграда. Сепак, Тодоровиќ завчера на седница на Советот на Општина Центар мистериозно ја повлекол првичната одлука. Од Општина Центар, повлекувањето на донесувањето на ДУП го оправдаа заради тоа што градоначалникот Тодоровиќ, од една страна, ја почитува желбата на граѓаните и приватната сопственост, но од друга страна, според ГУП, на тоа место е предвидена изградба на колективни станбени згради. - Градоначалникот се заложи во почитувањето на законската и на подзаконската регулатива во процедурата за донесување детални урбанистички планови за на државно земјиште да остане црковен објект, а на приватната парцела намена во согласност со планот - изјави Јовица Ацковски, портпарол на Општина Центар. Според нив, ДУП е повлечен заради намалување на димензиите на маркицата на станбената зграда, која сега нема да биде седумкатница, како што беше предвидено во планот, туку ќе биде петкатница, во согласност со останатите згради во околината. Сепак, од Отец Томе, кој е задолжен за изградбата на црквата „Света Ана“, дознавме дека црква задолжително ќе се гради. Како што вели тој, уште во мандатот на градоначалничката Аларова, во ДУП за Дебар Маало била предвидена изградбата на црква. Меѓутоа, сега се појавил друг проблем. Имено, според него, просторот кој што е наменет за црквата е многу мал, па со Тодоровиќ разгледувале можности за останатите парцели, чијашто сопственост се уште не можат да ја утврдат, со цел да и се доделат на црквата. - Ние имаме формирано иницијативен одбор за градба на црквата, имаме и жители што имаат и што сакаат да донираат средства за изградба на таа црква - така што црквата ќе се изгради, меѓутоа, не сега бидејќи просторот се уште не е одреден бидејќи не сакаме да изградиме каква било црква. Доколку ја градиме, да биде црква која што ќе прилега на тој дел, со средна големина - изјави Отец Томе.

Како издвоена целина -  мини спа центар, не е лошо.