Даниела Трајковска

Објектот на поранешната фабрика за сапун „Цветан Димов“, кој се наоѓа на најфреквентната улица во општина Кисела Вода, Првомајска, руиниран и запуштен, сега претставува собиралиште на бездомниците и на наркоманите. Граѓаните се жалат дека покрај тоа, зградата е и дувло на змии затоа што, како што тврдат, повеќепати ги забележале во неговата близина. - Цело лето гледавме змии во дворот на запуштената фабрика. Соседот една улови и ја уби. Со години зградата стои вака. Од Општината, освен тоа што повремено го чистат дворот, ништо друго не прават - вели Елена Ц. која живее близу старата фабрика. Бидејќи официјално не постои институција која би била надлежна за заловување на змиите, граѓаните се оставени сами на себе. - Ние не сме надлежни за ловење на змиите. Понекогаш излегуваме во пресрет на граѓаните, па кога ќе забележат змија пуштаме еден од нашите вработени да ја улови. Меѓутоа, до нас досега немало повик дека во старата фабрика се појавиле змии - изјави Дане Кузмановски, директор на Зоолошката градина. Граѓаните тврдат дека во старата зграда се збираат наркомани, кои зад себе оставаат употребени шприцеви. Таа е и дом за повеќе бездомници, кои палат оган за да се згреат, па, како што велат, постои опасност и да предизвикаат пожар кој може да ги загрози нивните домови. Од Министерството за внатрешни работи, пак, тврдат дека тие редовно вршат контрола на сите делови од градот, вклучувајќи ја и старата фабрика. - Се поднесуваат прекршочни и кривични пријави за сите оние кои во тој дел консумираат или продаваат дрога. Нашите активности ќе продолжат и во иднина, со цел да се спречи таквата појава - изјави Борче Пешевски, портпарол на МВР. Сликата околу оваа запуштена зграда е навистина грда. Освен скршените прозорци и графитите, погледот кон неа е уште полош поради тоа што околината е обрасната со грмушки и со висока трева. Жителите велат дека старата фабрика ќе се руши и дека на нејзино место ќе се гради новата општинска зграда. - Дознав дека на тоа место ќе биде новата општинска зграда. Меѓутоа, кога ќе ја градат, се уште не се знае бидејќи, колку што ми е познато, сопственикот е од Белград и воопшто не доаѓа тука - вели Сашо К. Во Општина Кисела Вода објаснуваат дека е во тек постапка за денационализација на тој простор. - Поради тоа што земјиштето во тој дел се уште е во постапка за денационализација, па поради тоа, во согласност со позитивните законски прописи, Општината не може да планира изградба на каков било објект таму, вклучително и нова општинска зграда - изјави Марјан Спасески, портпарол на Кисела Вода. Според него, уште во јуни, во соработка со Министерството за внатрешни работи, била спроведена акција за дислокација на дивовселените Роми во тие објекти, по што местото било целосно исчистено.

Крива Река ќе се заезерува

Архитекти и градежни инженери се ангажирани од локалната самоуправа на Крива Паланка да изработат нов проект за комплетно уредување на коритото на Крива Река, која треба да добие нов лик. Целта е со новите урбанистички решенија на вливот на Дурачка во Крива Река, во центарот на градот, да се направи атрактивно решение.

- Ги вклучивме стручните лица по потекло од Крива Паланка, кои веќе се докажани во својата струка, заеднички да изготвиме современо и атрактивно решение за уредувањето на коритото на Крива Река и во градското подрачје да направиме нов повеќенаменски простор за граѓаните. Посебен акцент ќе биде ставен на вливот на двете реки, кој треба да биде своевидна туристичка атракција според новиот проект - вели градоначалникот Арсенчо Алексовски.

Според договорот, ќе биде изготвена локална урбанистичка планска документација за реката во градскиот реон, кој опфаќа површина од 10 хектари. Предвидена е содржајна урбана опрема, која ќе го збогати и преобликува просторот, но и ќе добие нова функционалност. Проектот е од особено значење затоа што предвиденото уредување на Крива Река се наоѓа веднаш до магистралниот пат кон Деве Баир и може да биде основа за привлекување туристи.

- Формирано е координативно тело и веќе се дадени првичните идеи за изготвување на локалната урбанистичка планска документација. Посебна грижа се води за изборот на опремата што ќе биде вметната во предвидените урбани содржини, а која нема да биде пречка за протокот на Крива и на Дурачка Река. За нивниот влив, пак, се бара посебно решение - истакнува Добривој Николовски, раководител на одделението за урбанизам, градежни работи и заштита на животната средина.

Во тек е изработка на нацрт-план и на програма, кои треба да бидат прифатени од стручните лица и во нив да бидат вметнати најдобрите идеи и решенија. За дел од коритото општината веќе има добиено грант од 1,5 милион денари, со кои ќе се уредат пешачка и велосипедска патека. Но, општината бара комплетно решение за целото корито за да не се попречи понатамошното уредување со парцијалните проекти.

- Неопходно е да се донесе комплетна документација за целиот простор во градот, а не да се оди со парцијални решенија, кои во иднина може да се одразат врз реализацијата на предвидената програма - вели Николовски.

Архитектите и инженерите истакнуваат дека мора да се размислува и за решение со кое ќе се овозможи патот на рибите, кој сега е попречен од високите каскади изградени на Крива Река. Тие предлагаат заезерување на одредени места на реката со гумени перници, потоа изградба на водоскоци и други атрактивни објекти, кои ќе го преобразат речното корито во привлечен туристички локалитет. Новото решение треба да обезбеди и заштита од поплави од реките, кои во изминатиот период предизвикаа огромни штети врз инфраструктурата во градот.