Македонска Филхармонија

Стопирана изградбата на Филхармонијата

Наташа Стојановска	Коментари (0)

Стопирана е изградбата на Македонската филхармонија. Дел од градежниците запреа со работа оти три месеци не добиле плата.

„Нема да се пипне додека не не исплатат и за јули и за август.

-На мајсторот му викаше, ако сакаш работи, ако не ќе ти викнам полиција. Не може овде под притисок да работиш, полиција, а без пари.

-Денес, утре, денес, утре и дојде до тука, да застанеме со работа, затоа што нема за леб пари веќе“, велат работниците.

Од Градба промет, компанијата што работи како подизведувач на објектот велат дека не се точни тврдењата на работниците, немало заостанати плати. На терен објектот го гради Градба промет, а договорот е склучен со австриската Алпине, во меѓувреме министерството за култура не е известено дека има ангажиран подизведувач.

Од Алпине за А1 потврдуваат дека ја ангажирале Градба промет како подизведувач, но и дека редовно и плаќале оти редовно добивале пари и од државата.

„Владата вика дека има префрлено пари на Алпине, Алпине вика, има префрлено на Градба промет, Градба промет зошто не ни ги подели парите? Зошто да работиме без пари три месеца? И тоа што имавме од дома го потрошивме“, рече работник.

Од двете градежни компании велат дека имало промена во динамиката за изградба на Филхармонијата, поради измени во проектите.

Новата Филхармонија во центарот на Скопје се гради по нарачка на власта и е еден од покрупните проекти, но токму државата неодамна се соочи со долгови кон стопанството, особено градежниците кои и јавно се пожалија, целата работа ја ублажи дивидендата од Телеком која се искористи за враќање на дел од долговите.

Втор ден запрена изградбата на Филхармонијата

Наташа Стојановска	Коментари (0)

Земаат плата на рака, дел од нив не се пријавени, се работи и повеќе од десет часа - сето ова се случува на градилиште каде инвеститор е државата, а гради фирмата „Градба промет“ - со овие скандалозни тврдења на вработените, веќе втор ден е запрена изградбата на Филхармонијата.

„Работиме по десет саата, мораш да потпишеш на празен лист за да можат да прават што сакаат со нас, како ние да сме робови“, изјави работник.

- Целата плата ја земате на картичка?

„Не, не. Преку банка 10 илјади, а другите на рака, ако ни ги дадат, еве три месеци ги чекаме“, вели работник.

Ја бараат Трудовата инспекција.

„Има луѓе што работат, а не се пријавени, не се осигурани, пензионери има, ако дојде инспекција они се кријат“, рече работник.

Плата не добиле три месеци?

„Тато, вели, јас во сабота треба да донесам другарчиња да си славам роденден. Јас како да му најдам пари, дај пушти некоја пара, па ќе ти ги вратам“, вели работник.

Министерството за култура негира дека работата е стопирана, а „Градба промет“ тврди дека работниците не ја зборувале вистината.

„20 - 30 фамилии не можеме да лажеме“, додаде работник.

Освен ова изградбата на Филхармонијата ја тресе уште еден скандал. Министерството за култура договор склучило со австриската „Алпине“, а објектот го гради - „Градба промет“.

Останува нејасно како е можно министерството да не знае која фирма работи на објектот и зошто наместо фирмата што го добила тендерот - објектот го гради друга фирма за која вработените тврдат дека ги крши работничките права.