Македонска Филхармонија

Почнува изградбата на филхармониската сала

В среда ќе почне изградбата на новата концертна сала, која е предвидено да трае 14 месеци

Тина Иванова

Во среда, во 13,30 часот, на локацијата меѓу Македонската опера и балет и Факултетот за музичка уметност, ќе почне изградбата на новата концертна сала на Македонската филхармонија. „Конечно“, се радуваат филхармоничарите, „по шест децении како кираџии во Домот на АРМ, ќе имаме свој дом, ќе имаме концертна сала која ќе ги задоволува светските стандарди“.

Идејното решение за зградата на Филхармонијата е на архитектот Виктор Михајлов, кој токму со овој проект освои четврто место за најдобра градба во Европа на конкурс во Германија, а кој пред две години победи и на конкурсот за идејно решение на Турскиот театар, а претходно и на регионално ниво, на конкурсот за операта во Белград. Главниот проект пак, го изработи „Македонија проект“, додека градежните работи ќе ги изведува познатата фирма „Алпине Бау“ од Австрија, која има свои претставништва и во уште неколку европски земји. Според договорот, како што ни изјави министерката за култура, Елизабета Канческа-Милевска, новата концертна сала на Македонската филхармонија ќе биде готова за 14 месеци.

Инаку, изградбата на современа концертна сала за симфониско концертирање е еден од неколкуте капитални објекти во културата кои Министерството за култура ветува дека ќе ги реализира до 2010 година. Објектот на Македонската филхармонија ќе има две концертни сали. Во едната, која ќе има капацитет од 1000 до 1200 седишта, е предвидено да се изведуваат симфониските концерти и сите концерти за големи ансамбли, додека во помалата, со капацитет до 300 седишта, ќе биде сала наменета за камерна музика или за поспецифични концерти кои третираат и поинакви жанрови покрај класичната музика, како што е џез-музиката на пример.

Музичарите од филхармонијата ја поздравуваат изградбата на новата симфониска концертна сала и велат за нив, најважно е таа да има добра акустика. „Една држава не може да биде држава без филхармониска сала, без повеќе концертни простори, без национална галерија, без музеи, без театри, без кина. До сега ние, филхармоничарите, живуркавме како подстанари во Домот на АРМ. Постојано имавме проблеми со несоодветна акустика, со провевот и со ред други технички недоследности кои ни попречуваа во работата. Се надеваме дека државата ќе инвестира и во други објекти наменети за културата. Среќни сме што идните генерации музичари ќе можат да работат во соодветен амбиент“, едногласни се филхармоничарите.

„Почетокот на изградбата на новата концертна сала за Македонската филхармонија, која ќе биде и наш иден дом, претставува навистина историски момент, момент на надеж и решавање на многу проблеми со кои се соочуваа музичарите долги години наназад“, вели директорката на Филхармонијата, Маја Чаначевиќ. „Непостоењето на соодветен простор сите овие години, т.е.од основањето на овој оркестар, кој оваа година го прославува својот 65-ти роденден, придонесе во голема мерка назадување на оркестарот. Јасно е дека за да се негува нешто мора да постојат и соодветни услови за тоа, така е и со уметноста. Особено музиката е многу деликатна во тој поглед, бидејќи се работи со инструменти кои се жива материја и како тоа ќе се чуваат и каде ќе се свири на нив директно влијае на квалитетот на звукот. Постојат уште безброј чинители кои, доколку имавме концертна сала, сега, верувам, Филхармонијата ќе беше на уште повисоко ниво од она што е сега. Но, среќни сме што 25 март ќе биде денот, т.е. почетокот е крајот на сите наши проблеми поврзани со условите за работа и просторот. Концертната сала ќе овозмози збогатување на музичкиот живот во нашата држава воопшто. Не само во поглед на оркестарот на Македонската филхармонија, но и голем број можности да се поканат ансамбли, солисти, кои љубителите на класичната музика во Македонија заслужуваат да ги видат и слушнат во живо. Јас искрено се надевам на што поскоро завршување на нашиот иден дом и веќе со голема возбуда го чекаме денот кога ќе го одржиме и првиот концерт за прв пат во Македонија во вистинска концертна сала“, истакнува Чаначевиќ.

На прашањето, што им е на музичките уметници најбитно да го имаат во новата концертна сала, Чаначевиќ вели: „Музичарите во Македонија се навистина скромни луѓе кои, очигледно добро работат и во најлошите услови. Но, сега тоа време е минато и она што како музичар го очекувам од концертната сала, а како директор напорно работев за да го имплементирам, се неколку работи. Примарна е се разбира акустиката која во голема мерка придонесува за квалитетот на концертот. Освен акустиката, за нас музичарите се многу важни и дополнителните простории каде можеме да престојуваме и индивидуално да ги подготвуваме делата за концертите. Не помало значење има и осветлувањето на салата. Сите овие сегменти, кои навидум се безначајни, во суштина се премногу голем фактор кој влијае на секојдневното оркестарско живеење“.