Мал Ринг

Од Министерството за транспорт велат дека ДУП-от ќе го „врзе“ инвеститорот прво да ја изгради улицата, а потоа да гради над неа

Деспина Трајковска


Банкарската гаранција од 500.000 евра и обврските што произлегуваат од Деталниот урбанистички план се гаранција дека најповолниот понудувач за земјиштето на Јужен булевар прво ќе ја изгради подземната улица, а дури потоа ќе гради објекти над неа. Со овој став од Министерството за транспорт и врски од старт сакаат да ги разрешат дилемите кај дел од јавноста дека потенцијалниот купувач на земјиштето вредно најмалку три милиони евра ќе се нафати да го изгради комерцијалниот комплекс, но не и подземниот булевар.

Токму реализацијата на сообраќајницата е услов инвеститорот да продолжи со изградба на предвидените објекти, трговски и хотелски комплекс со максимална дозволена висина до 20 ката. Од Министерството за транспорт објаснуваат дека ДУП-от точно го утврдува редоследот на изградба.

„Во изводот од урбанистичкиот план е пропишан редоследот на реализацијата на објектите кои се опфатени на тој потег и е утврдено дека првично треба да биде изградена подземната инфраструктура, а потоа објектите кои се наоѓаат на надземно ниво, што претставува и редослед на градење кој се применува во пракса при реализацијата на вакви објекти“, велат од Министерството.

Според јавната објава, за најповолниот понудувач да го добие земјиштето ќе треба првенствено да склучи договор со Град Скопје. Со тој договор, всушност, ќе бидат уредени и деталите за изградба на подземната сообраќајница.

„Во спротивно, нема да се пристапи кон склучување на договорот за отуѓување и депонираните средства на најповолниот понудувач нема да му бидат вратени, а тој нема да може да учествува на секое идно јавно наддавање за предметната градежна парцела“, дополнуваат од Транспорт.

Колку време инвеститорот ќе има на располагање за да ја изгради подземната улица и дали и кои други услови ќе му бидат поставени се' уште не е утврдено. Барем така велат од Град Скопје и додаваат дека се' уште е рано да се зборува за деталите, допрва ќе се координирале со Министерството.

„Засега единствено е утврдено дека најповолниот понудувач прво ќе има обврска да потпише договор со нас со што ќе се договорат неговите обврски за проектот за улицата. Премногу е рано да зборуваме за деталите, тие се' уште не се познати. Допрва треба да добиеме официјален документ за избраниот понудувач на лицитацијата, па потоа да ја завршиме нашата обврска“, велат од кабинетот на градоначалникот Коце Трајановски.

Од таму потврдуваат дека и оваа градска власт, како и претходната смета дека изградбата на подземниот коридор е премногу скап проект за градскиот буџет, па затоа е одлучено подземната улица да ја гради потенцијален инвеститор. Проценуваат дека таа начелно би чинела околу 15 милиони евра, ако се има предвид дека онаа што Градот веќе договори да ја гради со помош на Владата грубо чини 30 милиони евра.

Урбанистичкиот план предвидува улицата да биде долга речиси еден километар, широка 31,5 метри, да има две ленти за возење од по 3,75 метри во двата правца и две ленти по 3 метри наменети за застанување на возилата. На подземната улица е предвиден и средишен коридор со трамвајска пруга.

Абер нема од подземната кај плоштад

Ова е втор случај инвеститор да добие обврска да изгради подземна сообраќајница. Слично и „Дивелоп груп“, кој ја гради зградата на местото на некогашна Народна банка, требаше да изгради подземен пристап до објектот. Но, и по три години откако стартуваше со изградба на деловната зграда, од улицата нема абер. Неколкупати досега инвеститорите изјавуваа дека поседуваат готов проект, но се правдаа дека имаат потреба од дотур на стока до градилиштето, па од тие причини не можеле да отворат ново градилиште за улицата. (Дс.Т.)