Минатата година во бугарски медиуми беше објавено дека големиот француски ланец на специјализирани хипермаркети Бриколаж (Mr. Bricolage) во Македонија ќе влезе во 2010, преку бугарската Доверие Брико АД. Бугарската компанија ги поседува франчизите за Бугарија, Македонија, Србија, Албанија, Црна Гора и Косово. Деновиве нивната фирма Брико Македонија објави оглас за вработување на постар специјалист за информатички технологии од кого се бара да ја воспостави информатичката основа за идните операции.

Францускиот ланец се концентрира на производи за уредување и одржување на домот и дворот, како и понуда на „направи сам“ производи. Низ светот има над 700 хипермаркети и е трет глобален играч на „направи сам“ пазарот. Во 2009 Бриколаж имал 12 илјади вработени (без франчизите) и остварил обрт од 2,2 милјарди евра. Во Бугарија веќе оперираат 10 хипермаркети со вкупно 75.000 метри квадратни и 800 вработени.  Во декември минатата година беше отворен и првиот маркет во Србија и тоа во градот Ниш, со површина од 5.800 метри квадратни, кој беше изграден и ставен во функција за помалку од половина година. Треба да следат објекти и во Белград, Нови Сад и Суботица. За 2010 исто така се најавува реализација на хипермаркет во Тирана, Албанија.

На просторот на стариот кванташки пазар во Скопје, на аголот помеѓу булеварот Војводина и улицата Перо Наков, во тек се подготвителни работи за изградба на првиот хипермаркет на францускиот ланец „Бриколаж“ (Mr. Bricolage) во земјава. „Бриколаж“ е специјализиран кон производи за уредување и одржување на домот и дворот, како и понуда на „направи сам“ производи. Во Македонија влегува преку бугарската фирма „Доверие Брико“ која ги поседува франшизите за Бугарија, Македонија, Србија, Албанија, Црна Гора и Косово, а настапот е во партнерство со „Скопски Пазар“.

 Според информациите кои пред три месеци „Скопски пазар“ ги објави на Македонската берза, компанијата има намера да изгради трговски објект наменет за однапред познати закупувачи. Финансиската тежина на проектот е проценета на 2,5 милиони евра, од кои еден милион евра се кредитно задолжување кај „Охридска Банка“. Вкупната површина на објектот кој треба да биде готов до крајот на годинава ќе изнесува околу 4.500 метри квадратни. Изведувач на градежните работи е „Масон-Инженеринг“, а за надзорот е задолжен „Балкан консалтинг“. Од „Скопски Пазар“ и „Брико Македонија“ засега не соопштуваат повеќе информации.

http://www.build.mk/?p=7174