Јавен автобуски превоз (општо)

АДРИЈА ВОВЕДЕ ОРГАНИЗИРАН ПРЕВОЗ СО КОМБИЊА

Пет евра по патник од Скопје до "Александар Велики"

Трансферот на патниците до аеродромот се врши час и половина порано, со поаѓање од пред претставништвото на Адрија" во центарот на Скопје. Во обратна насока комби-превозот се врши веднаш по завршувањето на пасошката и царинската контрола над патниците и багажот

Словенечкиот авиопревозник Адрија ервејс" им излегува во пресрет на своите патници кои немаат превоз до скопскиот аеродром "Александар Велики". Од вчера компанијата воведе комби-превоз до и од Александар Велики" и тоа за секој од своите летови кон и од нашата земја. Како што вели Момир Рафајлоски, директор на претставништвото на Адрија ервејс" во Скопје, ваквиот комби-превоз компанијата го организира за секој од вкупно 14-те летови, колку што ги има кон и од нашиот главен град.
- Адрија ервејс" има секој ден по два лета на релација Љубљана-Скопје и обратно, со полетувања од скопскиот аеродром рано наутро во 5,30 и попладне во 15,50 часот. Притоа, трансферот на патниците до аеродромот се врши час и половина порано, со поаѓање од пред претставништвото на Адрија" во центарот на Скопје. Во обратна насока комби-превозот се врши веднаш по завршувањето на пасошката и царинската контрола над патниците и нивниот багаж - велат од претставништвото на Адрија ервејс".

Со ваквиот превоз е опфатен и вечерниот лет на словенечкиот авиопревозник, чијшто прв авион пристигнува на Александар Велики" во 1,15 по полноќ. Рафајлоски посочува дека патниците мора однапред да си резервираат комби-трансфер, чија цена е пет евра, во денарска противредност, по патник.

Овој потег на словенечкиот авиопревозник се очекува да го следат и другите авиокомпании што оперираат на "Александар Велики". Таквото нешто до пред извесно време беше незамисливо, при што авиопатниците беа препуштени самите на себе и на сопствената организација на превоз до и од скопскиот аеродром. И тоа со свои возила или со такси, при што владее(ше) и невиден хаос со таксистите, кои набиваа превисоки цени на своите услуги и ги дереа патниците (за неупатените ја дигаа цената и до 25 евра), што, пак, за многумина од нив, кои прв пат беа во земјава создаваше многу грда слика, што ја носеа со себе како една од главните импресии од посетата на Македонија.

За воведувањето организиран превоз на авиопатниците до и од Александар Велики", со воспоставување редовна автобуска линија, неодамна расправаше и донесе заклучок и Советот на Град Скопје. Неговата иницијатива за конечно разрешување на ова прашање ја прифати и Јавното сообраќајно претпријатие Скопје", а во реализацијата на оваа долгогодишна идеја и замисла се вклучува и концесионерот и нов сопственик на македонските аеродроми - турски ТАВ.
Скопје е една од ретките, ако не и единствена метропола, која со години нема редовна автобуска линија до своето авиопристаниште. Секаде во светот аеродромите се поврзани со редовни автобуски, железнички, трамвајски или тролејбуски линии, па патувањето е брзо, едноставно и што е најважно, во најголем број случаи и евтино.                                                                                                                                                 http://www.vecer.com.mk/?ItemID=8BCF46C955990743BEAB69B5A56C5E14 

Елена М. Вељановска

Средношколците и студентите, кои што се возат на релација од Ново Лисиче до населбата Дексион и обратно, често ја користат интернет-конекцијата преку своите мобилни телефони или на лаптоп, која е достапна само во автобусот со број пет. Наспроти нив постарите патници се незадоволни и сметаат дека ваквата услуга воопшто не е потребна и дека претставува само фрлање пари, велат од ЈСП „Скопје“. Според надлежните од ова јавно сообраќајно претпријатие, овој пилот-проект, кој функционира неколку недели, можат да го користат сите оние, кои се превезуваат со возилото 694 на кое има поставено налепници дека во возилото има рутер за ваерлес. Ваквата бесплатна услуга во првите два месеци функционира како пилот-проект и е достапна за сите оние кои со себе носат лаптоп, посовремен мобилен телефон, „ајпод“, или, пак, МП3-плеер. Идејата е за поздравување и навистина е штета што ваквата услуга е достапна само во еден автобус на ЈСП „Скопје“. Јас неа секојдневно ја користам и на тој начин наместо да губам време додека седам во возилото, се приклучувам на интертнет, на „фејсбук“ или на „скајп“ и комуницирам со пријателите - вели средношколката Лидија од Ново Лисиче. Повозрасните граѓани, пак, велат дека ваквата услуга, која што од неодамна ја има воведено сообраќајното претпријатие, создава дополнителен метеж во возилото, затоа што интернетот е бесплатен и оние кои имаат можност гледаат максимално да го искористат.
Поради оваа услуга, младите брзаат да го зафатат секое слободно седиште и притоа немаат никаква почит кон постарите, кои се принудени да стојат. Никој веќе не станува на постар човек, а поради овој проект има и голем метеж. Според мене, ова се само залудно потрошени пари. На кого му треба интернет нека си стави дома, а не да користи во автобус - вели пензионерката Ката. Таа смета дека наместо да се даваат пари за воведување бесплатен интернет во старите автобуси, повеќе средства би можело да се издвојат за поправка на автобусите, кои многу често се расипуваат, на хигиената во нив како и за реконструкција на станиците, кои во моментот се наоѓаат во очајна состојба. Директорот на ЈСП „ Скопје“, пак, вели дека за поделеноста на мислењата во врска со интернетот во „петка“, според возраста на патниците, веќе е информиран и дека по два месеца откако ќе бидат сумирани резултатите од тоа колава била заинтересираноста на патниците за оваа услуга, ќе одлучат дали истата ќе биде воведена во сите автобуси и на сите линии на кои сообраќаат возилата. - Наидовме на најразлични реакции. Во моментов се уште тече пробниот период од два месеци и по неговото завршување од резултатите ќе зависи дали рутери за ваерлес ќе добијат сите линии - вели Николов.