Не јадете бурек во автобус!

Во градските автобуси патниците се хранат, но има и возачи што не само што јадат на волан туку и пушат цигари

Снежана Калабакова

Ќе научат ли некои скопјани што е дозволено да се прави, а што не во автобусите на јавниот градски превоз и дека тие не се ресторани за да се хранат во нив. Возачите забележуваат како патникот им влегува во возилото со бурек или сендвич в раце и најчесто не реагираат. Сево ова им пречи на останатите патници, кои не сакаат да седат на замрсените седишта или да ги допираат мрсните држачи од оние што јаделе бурек. Тие се плашат дека патниците со лоши навики многу брзо ќе ги извалкаат новите автобуси, кои наскоро ќе се најдат на скопските улици. Но, не е само тоа дека некои патници се однесуваат вака. Има и возачи што не само што јадат на волан туку и пушат цигари кога патниците ќе им влезат во автобус и ова особено се забележува кај приватниците. Внесувањето храна во возилата честопати е причина и за лошата хигиена, а уште полошо е што не се внимава ниту во поновите увезени автобуси. За разлика од приватниците, кои не знаат како да се справат со лошите навики на патниците и на своите возачи, во ЈСП „Скопје“ освен кодексот на однесување за возачите, и за патниците размислуваат да преземат чекори за да ги спречат ваквите појави.

„Среќна сум кога ќе влезам во понов чист, топол, приватен автобус. Во еден таков забележав млада мајка како кине од бурекот со раце и си го храни детето и си реков зарем не мисли дека владее грип. На крајот ја остави мрснотија на седиштето, а потоа ги испофаќа држачите со мрсни раце, кои по неа, ќе ги избришеме сите ние. Бадијала се етикетите во внатрешноста на автобусот што дошол од некоја европска метропола за забрането јадење сендвичи, сладолед или пиење сок. Забрането е дури и влегување со ролери. Само кај нас ништо не е забрането и никако да се научиме да се однесуваме европски“, вели скопјанката Вики Илиева.

Милорад Димитриевски, еден од сопствениците на приватното претпријатие „Макепрес“, вели дека засега ништо не можат да преземат за ваквото однесување на поединци, но повеќе пати досега апелирале нивните возачи да не пушат цигари во возилата.

„Свесни сме дека внесувањето храна ни ги валка автобусите, но не знаеме како да постапиме и што да преземеме, а да не ги навредиме и да ги изгубиме патниците“, објасни Димитриевски.

Од ЈСП „Скопје“ велат уште отсега размислуваат што да преземат за да ги заштитат новите автобуси од валкање.

„Во автобусите веќе залепивме големи налепници за забрането пушење цигари. На нив стои и апел до патниците ’Пријавете на веб-страницата на претпријатието’. Сега планираме да залепиме големи плакати на кои ќе стои кодексот на однесување за возачите и за патниците, потоа мрежата на линии и сите видови билети што ги нуди претпријатието“, објасни Билјана Јанкуловска, шеф на кабинетот на генералниот директор на ЈСП „Скопје“.

Прегоре електронската наплата во автобусите

Фирмата „Кент карт“ не го разви бизнисот како што планираше и сега само ги сервисира апаратите

Снежана Калабакова

Прегоре електронската наплата во приватните автобуси. И по две и пол години од воведувањето на ваквиот современ начин на наплата, не профункционира според планираното. Електронските картички ниту се применуваат ниту, пак, се продадоа во очекуван број. Електронските апарати, валидатори останаа непопуларни кај сопствениците на автобусите. Кај голем дел од нив останаа да висат само држачите за апаратите, кои никогаш не беа поставени. Оние, пак, што купија понови автобуси, не се многу заинтересирани да ги постават апаратите од старите на новите возила, бидејќи непотребно ќе си направат нови трошоци.

Турската фирма „Кент карт“, односно нивното претставништвото „Ксмет карт“, во Скопје не го разви бизнисот како што планираше. Таа сега е тука само за да ги сервисира апаратите.

Од приватното здружение „Слобода превоз“ велат дека пред три недели го затвориле и инфоцентарот на „Рекорд“ во центарот на градот, бидејќи вкупниот приход не можел повеќе да ги покрива превисоката кирија и останатите трошоци, односно, зарабатеното не било доволно да ја покрие ни интернет-конекцијата. Од претпријатието се уверени дека електронската наплата во автобусите ќе стане актуелна тогаш кога ќе профункционира единствениот тарифен систем, кој градските власти го имплементираат многу бавно.

„Одамна се зборува, а бавно се реализира воведувањето единствен тарифен систем во јавниот градски превоз. Очигледно е дека има кочничари на кои повеќе им одговара ваков начин на наплата, во кеш. А, познато е дека од основањето на ’Макекспрес‘ бараме да профункционира овој единствен тарифен систем. По налог на Градот ги ставивме електронските апарати, бидејќи, во спротивно, немаше да добиеме лиценци. Најдовме и препорачавме фирма со најдобри услови. За секој валидатор со ГПС-систем нашите луѓе инвестираа повеќе од 2.500 евра“, вели Ленин Јовановски, директор на приватното претпријатие „Слобода превоз“.

Тој додава дека единствениот тарифен систем ќе дадеше одговор на сите дилеми што се вртат во јавноста, како што е плаќањето на данокот кон државата, евиденцијата за бројот на патници, бројот на направените обрти на линиите и друго. Приватните превозници, вели Јовановски, не може да бидат надвор од системот на јавниот превоз. Но, според него, некому, веројатно, не му одговара да се знае кој го менува возниот ред и кој фалсификува билети.

Од вкупно 80 валидатори, во автобусите сега има 50 активни. Најмногу од нив се на линиите со броевите „22“ и „ 45“, а делумно на „12“, „23“ и „19“. Од „Слобода превоз“ објаснуваат дека не е точен честиот изговор на возачите дека апаратот не им работи затоа што нема сервисери, затоа што „Ксмет карт“ веднаш може да им го замени со друг. Досега се сервисирани 4-5 апарати што настрадале од неконтролираниот напон на акумулаторите на старите возила.