Јавен автобуски превоз (општо)

Четири фирми се нудат да ја модернизираат наплатата во ЈСП

Конечниот избор ќе се направи за месец и пол, а проценето е дека модернизацијата ќе чини 2 милиона евра

Четири компании се нудат да го обезбедат системот за „паметна“ наплата во автобусите на ЈСП. Македонските „Т-мобиле“, „Виста“, „Асеко“ и турската компанија „Асис електроник“ вчера доставиле понуди на петтиот по ред оглас на јавното претпријатие. Колку пари бараат компаниите за современиот систем за наплата, од ЈСП вчера не открија.

„Понудите беа отворени и сега следува период на евалуација, па одржување електронска аукција. Очекуваме дека најдоцна за месец и пол ќе заврши целата постапка и дека овој пат тендерот ќе биде успешен“, ни изјави вчера накусо Мишо Николов, директор на ЈСП.

Претпријатието вчера ги отвори понудите, по свесно одлагање на крајниот термин за две недели, бидејќи тоа, наводно, го барале заинтересираните компании. Тогаш од ЈСП рекоа дека биле подигнати 30 тендерски документации.

Инаку, надлежните се оптимисти дека овој пат, конечно, по неколкугодишни најави и распишани тендери, ќе изберат соодветна понуда за модернизација на наплатата во градските автобуси. Избраната компанија ќе има обврска за најмногу 46 месеци да го набави и да го монтира системот за автоматска локација на автобусите и електронскиот систем за наплата на билетите. Системот што ќе се монтира треба да содржи 40 информативни дисплеи на автобуските постојки преку кои ќе се добиваат информации за пристигнувањето на автобусите. Во сите автобуси ќе треба да се монтираат ГПС-уреди за сателитско следење на возилата.

Проценето е дека модернизацијата на ЈСП ќе чини околу 2 милиона евра. Најголем дел од трошоците ќе бидат покриени со субвенции од градскиот буџет. (Д.Т.Д.)

http://www.utrinski.mk/?ItemID=6A2BEF9CE9602545A5CF15DC11F02AAF

Ај за арно нека е ! НЕГО 46 месеци ,па тие на Марс да не одат случајно за да ги набават тие системи ?