Комерцијален објект наместо црква на плоштадот

РЕАKЦИИ ОД ГРАЃАНИ И ОД АРХИТЕKТИ

На плоштадот да не се гради ни црква ни зграда

Стручната јавност бара дебата на која ќе дискутира за предлогот на градоначалникот Владимир Тодоровиќ за бришење на маркичката за црква на плоштадот и изградба на деловен објект на нејзино место

Граѓани и архитекти упатуваат низа негативни реакции по најавата на градоначалникот на Центар Владимир Тодоровиќ дека на местото на планираната црква на плоштад Македонија можна е изградба на деловен објект. Многумина го поздравуваат потегот на Општина Центар да ја избрише маркичката за црквата „Свети Kонстантин и Елена“ од плоштадот, односно да ја дислоцира пред домот на АРМ. Но, затоа пак реакциите се жестоки во врска со идејата на местото на црквата да се зацрта деловен објект, конкретно пред сегашната зграда „Лумикс“, кај ЕВН.

Просторот да дише

Никола Велковски, поранешен главен градски архитект и сегашен претседател на Групацијата за градежништво при Стопанската комора, смета дека со каква било нова градба плоштадот ќе се затвори, не ќе може да дише, бидејќи од другата страна е планирана изградба на Градска куќа, а и хотел. Поради овие причини, неговата порака е таму да не се гради ништо.

- Kако професионалци, првостепено, уште на почетокот укажувавме дека на тоа место воопшто не треба да се стави нова маркица, без разлика за каков објект станува збор, дали за црква или за нешто друго - изјави Велковски.

И архитектот Минас Баклачев е на иста линија.

- Лично сметам дека тој простор треба да остане празен, без физички објект. И визуелно не би било убаво доколку таму има некаков објект - кусо искоментира Бакалчев.

За архитектот Вангел Божиновски, пак, е неоправдано дислоцирањето на црквата од градскиот плоштад, на платото на Домот на АРМ.

Стручната јавност мора да дебатира

- Мислам дека промената на урбанистичкиот план „Мал ринг“ во врска со црквата, поради кои настанаа општествени турбуленции, е неоправдана. Треба да се размисли околу таа работа. Според мене треба да се собере пошироката стручна јавност и таа да ја донесе конечна одлука. Црквата „Свети Kонстантин и Елена“ на таа локација беше предвидена уште пред повеќе години. Не треба да се брза само заради тоа што се појави општествен проблем што нема врска со архитектурата- изјави архитектот Божиновски.

Воедно смета дека тој простор веќе има функција, парк, и дека не треба да зафаќа со нешто ново.

Претседателот на Асоцијацијата на архитекти на Македонија, Даница Павловска, предлага студија со цел да се види дали е можно на тој простор да никне деловно-административна зграда.

- Таа студија која ја спомена градоначалникот Тодоровиќ ќе даде одговори дали е оправдана изградбата на таков објект на плоштадот Македонија. Потоа, би се дебатирало и разговарало. Потребен е постојан дијалог со стручната јавност. Бараме стручно и аргументирано да се разговара на оваа тема - потенцираше Павловска.

Од Општината Центар, пак, повторија дека измените на урбанистичкиот план „Мал ринг“ се во тек и дека идејата не е конечна.

- Идејата се разработува, а потоа ќе следи јавна презентација на измените и дополнувањата, како и јавна расправа - одговорија од одделението за односи со јавноста.

Не изнесоа став дали по секоја цена мора на местото на црквата да се гради нешто сосема друго. Не дадоа ни одговори на колкава површина ќе биде предвиден новиот објект, како и детали за катноста и висината.

Анела Петрова

Никола Велковски: На тоа место воопшто не треба да се стави нова маркица

Даница Павловска: Студијата ќе даде одговори дали е оправдана изградбата на таков објект на плоштадот Македонија

АНKЕТА: Шеталиштето да остане широко и светло

- Ова е пијана држава. Нема врска што прави. Kако прво, нема место на плоштадот да се гради ваков објект. Kакви се тие проектанти што го загадија Скопје. Се претера, на секој метар скулптура, па сега и административна зграда. Не доаѓа предвид на тоа место да никне таков објект. Денеска градовите се бели, светли, со широки улици. Ние напротив, го стеснуваме просторот.
Цане Јанкуловски, академски сликар и вајар во пензија

- Според мене, на тоа место треба да си остане црква. Тоа е свето место, каде што некогаш постоел храм. Добро е што нешто воошто се гради. Менка Трнинковска, пензионер

- Сметам дека плоштадот го начичкаа. И сега е тесно. Имаме еден огромен споменик и сметам дека е доста. Не се потребни дополнителни објекти. Марика Рангелова, дипломиран економист

- Не е пожелно да се гради што било повеќе на плоштадот. Треба да се остави повеќе простор. Плоштадот треба да биде поотворен.
Иван Сандев, студент

Искрено не ја гледам поентата зошто си губите повеќе време и нерви за ваквите "проекти". Едноставно луѓето си шетале по европските метрополи, гледале панорамски слики како сите градови се збиени со куп згради околу нив, како секој средновековен плоштад е опколен со низа згради и луѓето си решиле ајде сеа да иаме и ние таква ситуација. Плус аргумент од типот дека ќе се загуши плоштадот е тотално ирелевантен во ваква ситуација, затоа што секогаш ќе се појават поддржувачи на оваа идеја кои ќе дадат аргументи дека воопшто нема да се загуши плоштадот. Како што Лумикс некако го збутаа и се повеќе се склапа у околината и е прифатен од народот, како што Цветен го изградија во Загреб,  а притоа деноноќно група на луѓе протестираше, за на крај Цветен да е преполн со купувачи на кои не им е битна местоположбата на истиот, така и тука ќе си се направи објектот, вработените ќе се радуваат што си работат ем у строг центар ем одма до десетина кафичи, а после тоа и секој останат граѓанин приќутно ќе го прифати.

Едноставно за градба на ваква местоположба многу е потешко да се најдат аргументи против, отколку што треба сите релевантни архитекти во Скопје да станат на бунт против Дебар Маало и Водно. Мене не ми е гајле што ќе прават со плоштадот, мене ми е гајле за тоа што го уништија Водно, го уништија најстарото урбано јадро во Скопје, Дебар Маало, а одеднаш секој се појаував да протестира за вакви објекти. 

Е затоа е пијана државата, затоа што секој по малку допринесува да ја доопијани.

Една молба. Дали може некој да ми го нацрта местото на кое била куќата на Бојаџиу. Го има во живо... ама неможам да се снајдам преку гугл ‘рт. Па ако некој може да ми го нацрта на ‘рт и да пушти слика тука би било супер...