Буџет(и) - Скопје

В година со нова градска плажа и стационар за коњи

Буџетот на Град Скопје е позициониран на 89,3 милиони евра, односно за околу 22 милиона повеќе отколку во 2010 година

Коњите што подолго време се шетаат по скопските улици, градската власт конечно ќе ги згрижи во стационар. Скопје дочека градските челници да издвојат пари за згрижување на овие животни со Буџетот за 2011 година, во кој се предвидени средства за изградба стационар за коњи. За оваа намена ќе се потрошат околу 30.000 евра.

В година ќе се гради уште една градска плажа, под стариот Народен театар, кај мостот „Гоце Делчев“, објект кој се' уште е во изградба. Тоа е онаа плажа што беше првично најавена, но беше одложена поради градежните работи за проектот „Скопје 2014“, па плажата се пресели кај Луна-паркот.

Буџетот сега е позициониран на 89,3 милиони евра. Толку приходи Градот очекува да прибере в година, односно за околу 22 милиона повеќе отколку во 2010 година. Доколку не се оствари оваа проекција, Буџетот ќе претрпи ребаланс во текот на годината. Така се случи со Буџетот за 2010, кој двапати беше прекројуван и многу проекти беа одложени.

На градоначалникот Коце Трајановски му остануваат за довршување втората фаза од булеварот Македонска војска, третата фаза од „Србија“, почетокот на градбата на мостот кон Сарај, подземните и надземните пешачки премини, реконструкцијата на езерото Треска, за кое се издвоени околу 450.000 евра и санација на многу културни објекти (Салон 19.19, МКЦ, Музејот на Стара чаршија во Сули ан). Ќе се поправаат и зградите на неколку средни училишта и фискултурни сали, за што се планирани 600.000 евра. Заостанат проект е и воведувањето т.н. смарт-тикетинг во јавниот превоз и автоматско следење на автобусите.

Капитални проекти што градската власт ги најави како нови и ќе почнат да се остваруваат во наредните две години се двете катни гаражи, кај ТЦЦ „Плаза“ и на улицата Мито Хаџи Василев-Јасмин, паркинзи за тешки товарни возила под Транспортен центар и кај Зоолошката градина, како и реконструкција на пет фасади на згради на плоштадот Македонија како дел од проектот „Скопје 2014“, во износ од 600.000 евра.

Во 2011 година ќе почне проширување на булеварот Христијан Тодоровски-Карпош (од Општина Бутел до обиколницата) и проширување на улицата Теодосиј Гологанов од НИП „Нова Македонија“ до студентскиот дом „Гоце Делчев“, за што ќе се потрошат околу 750.000 евра. Ќе почне изведбата на прва фаза од изградба на улицата Индустриска, зад ФОН, а планирано е продолжување на градежните работи на булеварот Илинден, и тоа од „Никола Парапунов“ во Карпош 4 до булеварот 8 Септември во Карпош 3.

Ќе се реконструираат улиците Визбегово, Козле, Првомајска (кај Маркова Река), Самоилова (на Кале). Атмосферска канализација ќе добие месната заедница „Бајрам Шабани“, булеварот Христијан Тодоровски-Карпош, а во Горно Лисиче ќе се гради пумпна фекална станица, во Парк филтер-станица, а пречистителна - за реката Серава.

Јорданка Ивановска

Трајановски ќе се рекламира на ТВ и со летоци

Во Предлог-буџетот за 2011 година може да се забележи дека градската власт в година има сериозна намера поагилно да се рекламира, односно да го следи трендот на Владата кога се работи за самопромоција. За таа цел ќе се потрошат околу 180.000 евра.

Освен весникот како досегашно гласило, за тие цели ќе се закупи термин на ТВ, и за тоа се предвидени околу 150.000 евра, со образложение - за дополнително информирање на граѓаните. Градската власт има намера да спроведе и граѓанска анкета за 15.000 евра. Ќе се печатат и летоци и брошури за 450.000 денари за проектите што ги работи Трајановски.