Се множи барокот во Вардар

• Објавено: пред 8 часа
• Прочитано: 2365
• Печати

Покрај четирите сплава во Вардар кои ќе функционираат како ресторани, урбанистите предвидоа уште два, а идните концесионери на сплавовите за кои сè уште не е потпишан договор за стопанисување, наместо 10, со нив ќе менаџираат 20 години. Зголемувањето на бројот на сплавови во вид на барокни галии се предвидува во најновите измени на ДУП-от „Мал ринг, кои во моментот се на јавна анкета. Допрва следува нивно верификување од Советот на Општина Центар. 
Идните концесионери на сплавовите за кои сè уште не е потпишан договор за стопанисување, наместо 10, со нив ќе можат да менаџираат 20 години. Ова нема да важи за двата сплава за кои е веќе избрана фирма која ќе ги гради и ќе управува со нив 10 години. 
Советот на градската власт ја усвои одлуката со која се продолжува рокот на правото на поставување на „урбана опрема“ од 10 години на 20 години со цел да се поттикне интересот на потенцијалните инвеститори за преостанатите два сплава на левиот брег на Вардар, утврдени во Деталниот урбанистички план за најтесното централно градско подрачје „Мал ринг“. 
- Тие што веќе ги добиле двете локации за изградба на сплавови, кај МЕПСО и кај хотелот „Холидеј ин“, веќе потпишале договор со што прифатиле одредени услови. Бидејќи за другите две локации досега не се јави никој, сметаме дека на овој начин ќе се зголеми интересот за издавање под концесија на другите два сплава. Периодот на стопанисување е зголемен за да може избраните концесионери да си ја вратат вложената инвестиција – објаснува Гордана Клинчарова, секретар на Град Скопје. 
Одлуката сепак се изгласа без гласовите на советничката група на СДСМ, кои се сомневаат дека новите услови за стопанисување кријат некоја заднина.
- Зошто се носи ваква одлука и дали таквата урбна опрема е многу важна и потребна за граѓаните за да неколму се даде 20 години да стопанисува со градска јавна површина. Ако досега распишуваме огласи, а нема заинтересирани, зошто сега ги подобруваме условите, кога токму во „Малиот ринг“, конкретно во ГТЦ, голем дел од деловниот простор не функционира. А, на овој начин, оваа опрема е директна нивна конкуренција – прашува советникот Никола Велковски, од СДСМ. 
Фирмата „Фаланга дрим“ ќе ги гради двата сплава во вид на бродови, кај МЕПСО и кај хотелот „Холидеј ин“. Откако ќе ги изгради со нив ќе стопанисува 10 години, а месечно за нив ќе му плаќа рента на Градот во висина од 1.050 евра за едниот и 1.250 евра за другиот сплав.
Една од барокните галии што следното лето ќе се укотви во водите на Вардар ќе биде елитен француски ресторан, со француски готвачи, а другиот сплав ќе биде ланч бар, со внатрешност изведена во модерен барок.

ГМВ