Плажи и бродови на Вардар

Роза Петкова

Новата градска плажа, која Град Скопје ќе ја гради под Стариот народен театар, од левата страна на Вардар, е за 50.000 евра поскапа од првата, која градските власти ја изградија лани лето зад „Луна парк“, а чинеше 100.000 евра. Угостителите кои ќе стопанисуваат со сплавовите, меѓу другото, ќе мора да ги исполнат условите предвидени во Законот за внатрешна пловидба. Парите за новата градска плажа за скопјани се предвидени во буџетот на Град Скопје за 2011 година. Новина е и тоа што, за разлика од лани, кога четири скопски кафулиња беспари ги добија шанковите на плажата, годинава градоначалникот Коце Трајановски реши да наплаќа за отстапените маси и столчиња. Градот ќе бара и фирми што ќе бидат заинтересирани на свој трошок да постават четири сплавови во Вардар, на потегот од мост Гоце Делчев до мостот кај хотелот „Холидеј ин“. Сплавовите се дел од деталниот урбанистички план за „Малиот ринг“, кој го донесе Општина Центар.
Изградбата на втората градска плажа, како една од инвестициите во предлог-буџетот за 2011 година, заедно со одлуката за давање под закуп на урбаната опрема на плажата, се точки на дневниот ред за седницата на Советот на Градот, која ќе се одржи в четврток.
Во одлуката предложена од градоначалникот, се вели дека урбаната опрема на плажата ќе се даде по закуп, но не е наведено на колкав временски период. Кога ќе излезе јавниот оглас ќе се знае која е почетната цена на закупнината, а за најповолен наддавач ќе биде избран тој што ќе понуди најмногу. На огласот ќе можат да се јават домашни и странски угостителски групации во кои членуваат по четворица сопственици за да може секој од нив да добие по еден шанк. Во огласот ќе биде наведено дека шанковите од двете плажи не може да бидат закупени од ист учесник. Угостителите ќе бидат задолжени да се грижат за одржувањето и за обезбедувањето на опремата поставена на плажите, да понудат програма за забава на посетителите со музички и со спортски настани, да ги плаќаат сметките за електрична енергија и за вода и да имаат единствени цени за пијалаците.
За разлика од плажите, одобренијата за поставување сплавови ќе се издаваат на користење за подолг временски период, десет години, со можност за продолжување. Тие, исто така, ќе служат како угостителски објекти, а на огласот што ќе го објави Градот ќе можат да учествуваат домашни и странски правни и физички лица. Трајановски ќе ги издава одобренијата за поставување на сплавовите, а доколку по истекот на десет години не се продолжат, тогаш угостителите се обврзани да ги отстранат сплавовите.
Неодамна градските власти распишаа и тендер за фирма што ќе ја изгради потребната инфраструктура за новата плажа и за четирите сплавови, на сметка на Градот. Летово Трајановски ја изгради првата градска плажа и за неа потроши околу 100.000 евра. На нејзиното отворање нагласи дека станува збор за плажа на која скопјани ќе можат да се сончаат, забавуваат, но не и да пливаат. Истата забрана за пливање во Вардар ќе важи и за новата плажа и за четирите сплавови.

Скопјани налето ќе се ладат на четири сплава

За четирите сплавови-кафеани на реката Вардар, распоредени од мостот „Гоце Делчев“ до мостот кај „Холидеј ин“ вчера градските власти објавија јавен конкурс за издавање на пловните објекти.

Според јавниот оглас, заинтересираните кафеанџии за сплавовите ќе може да аплицираат до 11 април годинава, а за најповолни понуди ќе се сметаат тие што ќе имаат најубаво идејно решение - дизајн, но и тие што ќе понудат највисока закупнина. Одобрението за поставување на сплавовите ќе се издава во период од 10 години, со можност за продолжување.

Сплавовите се дел од проектот „Градска плажа 2“, која ќе се гради во близина на Камениот мост. Тие ќе бидат симетрично поставени на двата брега на реката Вардар, кај хотелот „Холидеј ин“ и кај мостот „Гоце Делчев“.

Четирите сплава, велат од Градот, ќе бидат наменети за уживање и за разонода на граѓаните во жешките летни денови, а ќе бидат сместени меѓу фонтаните, пешачките мостови и новата градска плажа на Вардар, во околината на Камениот мост.

Според градските власти, сплавовите нема да служат за скокање, затоа што водите на Вардар се забранети за капење, туку за да се збогати ноќниот живот во Скопје.

Сплавовите влегуваат во програмата на градоначалникот Трајановски за оваа година како капитални зафати, вредни повеќе од 150.000 евра.

Од градот с` уште не знаат дали сплавовите ќе бидат угостителски објекти, кафеани, како во Белград, Србија, на реката Дунав.

- Сплавовите ќе претставуваат содржинско и функционално дополнување на градската плажа, како место каде што во летните денови скопјани ќе се разонодуваат, рекреираат и ќе се релаксираат од жештините во летниот период - овелат од градското одделение за односи со јавноста.

Град Скопје, исто како и на првата градска плажа, која се наоѓа во близина на Луна-парк, ќе ја постави неопходната инфраструктура - довод, одвод, електрична инсталација.

- Сплавовите ќе бидат дадени под концесија, а тие што ќе бидат избрани, ќе бидат задолжени и за нивна изградба. ЗА безбедносните стандарди, за да се заштитат од поплави, нема да има проблеми. Проектите се влезени во урбанистички план, во Општина Центар, а ќе бидат изградени од концесионери, кои ќе бидат избрани во тендерската постапка, Концесионерите при изградбата и користењето ќе мора да ги исполнат строгите безбедносни, градежни и санитарни услови - велат од Градот.

Иако веќе е објавен јавниот конкурс за сплавовите и се бараат кафеанџии, с` уште не се знае за каков тип пловни објекти станува збор, за нивните димензии - ширина, должина и од кој материјал ќе треба да бидат изработени.

Марија Тасев