Споменици и скулптури (општо)

Луксузна ограда покрај лавовите на „Гоце Делчев“

Владимир Тодоровиќ

Ќе се урива старата, ќе се поставува нова ограда на мостот „Гоце Делчев“. Од Градот најавуваат дека допрва ќе ги отвораат понудите.

Не знаат и кажуваат колку пари ќе чини новата ограда на „Гоце Делчев“, која треба стилски да се совпаѓа со лавовите од двата краја на мостот.

„Малку се доцни околу релјефите, тоа е на постаментот на лавовите и благовремено сигурно ќе ги направиме припремните работи, за тие кога ќе дојдат, да бидат и поставени. Октомври се очекува да бидат донесени“, изјави Владимир Тодоровиќ, градоначалник на Центар.

Неофицијално, оградата ќе биде во барок стил, како два од лавовите. Подолго време идејното решение го подготвува еден од авторите, кој веќе е ангажиран за изработка на дел од спомениците и скулптурите што ќе бидат поставени во центарот на Скопје и на мостот „Гоце Делчев“.

Според експертите, овој зафат би бил поскап од поставените лавови на мостот.

Од Култура велат дека тие не го финансираат овој проект, а од градот Скопје дека најверојатно тие ќе го платат, иако немаат предвидена висина на буџетот за оваа намена.

Од Култура додаваат дека нивната работа завршила со скулптурите кои срамежливо продолжуваат да ги поставуваат во изминативе денови.

Од 35 вкупно скулптури, Врби ќе биде поставена во Вардар кон крајот на годинава, а Портата што ќе ги спојува „Чичко Стоилко“ и „Пелагонија“ е оставена за следната година.

Колку пари ќе чини Портата нема одговор.